Mjólkurrisi kaupir Siggi's skyr

Franski mjólkurrisinn Lactalis hefur ákveðið að kaupa The Icelandic Milk and Skyr Corporation, sem var stofnað af Sigurði Kjartani Hilmarssyni árið 2006 og er að stærstum hluta í eigu Íslendinga. Þetta kemur fram í tilkynningu frá fyrirtækinu en þar fylgir kaupverðið ekki sögunni, einungis að Lactalis muni festa kaup á fyrirtæki Sigurðar. Fréttablaðið greindi frá viðræðum fyrirtækisins við fjárfesta í desember.



Vörur fyrirtækisins, sem eru seldar undir vörumerkinu Siggi’s skyr, eru fáanlegar í um 25 þúsund verslunum í öllum ríkjum Bandaríkjanna og er það með um tveggja prósenta markaðshlutdeild af jógúrtsölu í Bandaríkjunum. Í frétt Reuters er jafnframt greint frá því að svissneska mjólkurfyrirtækið Emmi, sem átti um 22% hlut í fyrirtæki Sigurðar, hafi einnig ákveðið að selja allan sinn hlut til franska risans. 

Lactalis er eitt allra stærsta mjólkurfyrirtæki í heiminum. Vörur þess eru fáanlegar í 85 löndum og starfa um 75 þúsund manns hjá fyrirtækinu. Ætlað er að árleg velta Lactalis nemi rúmlega 2000 milljörðum íslenskra króna.

Heimildarmenn Fréttablaðsins sem þekktu til söluferlisins, sem leitt var af fjárfestingabankanum JP Morgan, áætla að söluverðið kunni að hafa verið í kringum 300 milljónir dala, jafnvirði um 30 milljarða íslenskra króna.

Sjá einnig: Vilja kaupa Siggi's skyr fyrir um 30 milljarða króna

The Icelandic Milk and Skyr Corporation er í 75 prósent hluta í eigu Sigurðar og ættingja hans, vina og annarra sem þeim tengjast. Eignarhlutur Sigurðar sjálfs er um 25 prósent.

Vöxtur fyrirtækisins hefur verið hraður á undanförnum árum og segir í tilkynningu Lactalis að Siggi's skyr sé nú meðal vinsælustu jógúrtvara í fjölmörgum verslunum vestanhafs. Talið er að velta The Icelandic Milk and Skyr Corporation aukist um lið­lega 50 prósent á þessu ári og verði þá samtals um 200 milljónir dala, jafnvirði 21 milljarðs króna.

Spenntur fyrir framhaldinu

Haft er eftir Sigga í tilkynningunni að hann sé mjög spenntur að vera að ganga til liðs við „Lactalis-fjölskylduna,“ sem muni gefa fyrirtækinu færi á að vaxa enn frekar. „Grunngildi okkar um einfalda innihaldslýsingu og minni sykur verða 100% eins og þau voru. Neytendur alls staðar eru að reyna að minnka sykur í mataræði sínu þannig að markmið okkar á sér hljómgrunn um víða veröld.“

Aðalskrifstofur Siggi's verða áfram í New York og verður fyrirtækið áfram undir núverandi stjórn, þar með talið Sigurðar Kjartans Hilmarssonar.

Í viðtali í janúar 2014 lýsti Sigurður því hvernig fyrirtækið hefði vaxið og dafnað út frá uppskrift að skyri frá árinu 1963 sem móðir hans sendi honum í faxi frá Íslandi. Áður en skyrframleiðslan hófst starfaði hann við fyrirtækjaráðgjöf hjá Deloitte á Wall Street en sagði upp þegar skyráhuginn kviknaði. The Icelandic Milk and Skyr Corporation selur í dag um 30 vörutegundir, er með um 40 starfsmenn í vinnuog mörg hundruð undirverktaka sem framleiða vörurnar.