Febrúarspá Siggu Kling - Steingeitin: Kemur fyrir að þú einangrar þig í tómri vitleysu

Elsku Steingeitin mín, þú ert svo dásamlega stolt og hjartahrein persóna og það er svo mikilvægt að þú afhjúpir þitt rétta eðli því þá verður allt svo mikið skemmtilegra.

Þú hefur svo fjölbreytt og merkilegt ímyndunarafl, en átt það til að festast í því og það kemur fyrir að þú einangrar þig í tómri vitleysu. Þú hefur tilhneigingu til þess að hafa svo mikla þráhyggju gagnvart því sem þig langar að gerist að ekkert annað kemst að í þínum fallega heila. Ef þú skoðar þetta orð þráhyggja, þá þýðir það stöðuga hugsun um það sem þú þráir og þá komast ekki aðrar hugsanir að til að breyta lífinu.

Óskir þínar virka einfaldlega þannig að það er eins og þú sért með stóran katalog eða pöntunarlista yfir allt sem til er í heiminum, en þú þarft ekki stöðugt að vera á sömu blaðsíðunni því alheimurinn er búinn að stimpla það inn sem þig vantar. Þá færðu þetta fjölbreytta lífsmynstur sem þú í raun þráir því vaninn drepur þig og er þar auki fitandi.

Aldrei nokkurn tímann skaltu reyna að hrinda þeim sem eru að stoppa þig, því það mun koma í bakið á þér, nú er ég að tala við mjög fáar Steingeitur í sambandi við þetta. Láttu engan fara í taugarnar á þér þá verðurðu heppnari en þig gæti grunað. Það hefur allt verið að breytast svo hratt undanfarið og ef þú finnur ekki fyrir þessum breytingum ertu búin að líma þig fasta og ert ekkert tengd orkunni sem lífið gefur þér.

Mér finnst það dásamlegur kostur þinn hversu skoðanaföst þú ert og gefur þig aldrei og þú munt gera góða samninga og klára málin og sjá svo sannarlega vel ef einhver ætlar að leika á þig. Þú átt eftir að snúa ólíklegustu persónum um fingur þér. Nýttu þér þessa orku til þess að fá betri status fyrir sjálfa þig.

Skilaboðin þín eru: Gerðu aðeins meira en þitt besta þá er útkoman sigur – Gerum okkar besta (Ísland B - heimsmeistari)

Kossar og knús – þín Sigga Kling

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja, Hendrika Waage hönnuður, Laddi.