Svanhildur Nanna nýr stjórnarformaður VÍS

Fjárfestirinn Svanhildur Nanna Vigfúsdóttir var kjörin stjórnarformaður Vátryggingafélags Íslands (VÍS) á fyrsta fundi nýrrar stjórnar fyrirtækisins í gær. Þá var Helga Hlín Hákonardóttir, lögmaður og sérfræðingur hjá Strategíu, kjörin varaformaður.

Svanhildur hafði áður í samtali við Markaðinn staðfest að hún ætlaði að bjóða sig fram í stjórn VÍS. Hún og eiginmaður hennar, Guðmundur Örn Þórðarson, eiga samanlagt um átta prósenta hlut í tryggingafélaginu. Guðmundur átti sæti í stjórn þess um tíma en dró framboð sitt í stjórn félagsins til baka á síðasta aðalfundi í mars í fyrra.

Ný stjórn VÍS var kjörin á aðalfundi félagsins gær en þar var einnig samþykkt tillaga um að VÍS greiði hluthöfum sínum 1.023 milljónir króna í arð vegna reksturs fyrirtækisins í fyrra. Aðalfundur samþykkti einnig að lækka hlutafé félagsins úr kr. 2.296.436.567 að nafnverði í kr. 2.223.497.541 að nafnverði, og að eigin hlutum félagsins að nafnverði kr. 72.939.026 sé þannig eytt.

Stjórn VÍS skipa: Gestur Breiðfjörð Gestsson, Helga Hlín Hákonardóttir, Herdís Dröfn Fjeldsted, Svanhildur Nanna Vigfúsdóttir og Valdimar Svavarsson.