Gloppóttur sigur á Belgum

Íslenska karlalandsliðið í körfubolta vann góðan sigur á Belgíu, 83-76, í vináttulandsleik í Smáranum í gærkvöldi en um var að ræða fyrri leik þjóðanna í heimsókn Belga hingað til lands. Ísland hefur leik á Eurobasket í lok ágúst og er undirbúningurinn nú formlega hafinn.

„Það er mjög mikilvægt að vinna fyrsta leikinn í undirbúningnum og það á móti svona sterku lið,“ segir Logi Gunnarsson, leikmaður íslenska landsliðsins, en hann skoraði tíu stig í leiknum.

„Það er kannski töluverður stirðleiki í okkur og við vorum að dreifa álaginu mjög mikið í kvöld. Það fengu því allir að spila eitthvað sem er mjög gott.“

Logi segir að leikur íslenska liðsins hafi verið gloppóttur.

„Mér fannst við vera fínir í fyrri hálfleik og þar náðum við góðu forskoti. Við hleypum þeim allt of nálægt okkur í seinni hálfleiknum og þeir komast allt of oft á vítalínuna. Þetta hefur sennilega verið frekar leiðinlegur leikur að horfa á,“ sagði Logi.

Íslenska landsliðið er á leiðinni í Eurobasket í lok ágúst þar sem liðið mætir Grikklandi, Póllandi, Finnlandi, Slóveníu og Frakklandi. Ísland spilar aftur við Belgana í kvöld og þá á Akranesi.

Íslenska liðið var í töluverðum vandræðum með að gera gjörsamlega út um leikinn í gærkvöldi og ná það góðu forskoti að hann væri í raun búinn.

„Ég held að það sé mjög eðlilegt þar sem það eru svo margir að koma inn af bekknum og liðið breytist nánast í hverri einustu sókn. Það getur haft svona áhrif á lið.“

Hann segir að það sé mjög mikilvægt að fá góða þjóð strax í upphafi undirbúningsins.

„Það er bara frábært að spila við alvöru lið strax og sjá hvað við þurfum að laga og vinna í fyrir stóra mótið.“