Kirkjuráði er full alvara með því að auglýsa Laugaveg 31 til sölu

Oddur Einarsson, framkvæmdastjóri kirkjuráðs, segir ráðinu full alvara með að selja Laugaveg 31.

Þetta kemur fram í yfirlýsingu frá Oddi í kjölfar ummæla kirkjuráðskonunnar Svönu Helenar Björnsdóttur. „Við erum bara að athuga hvaða verð við gætum fengið fyrir húsið. Við höfum sett húsið á sölu en það er engin skuldbinding að selja,“ sagði Svana í Fréttablaðinu í gær.

„Kirkjuráði er full alvara með að selja húsið en það verður auðvitað ekki gert nema ásættanleg tilboð berist frá traustum aðilum en kirkjumálasjóður, eigandi hússins, þarf að svara fyrir allar gjörðir sínar gagnvart Ríkisendurskoðun,“ segir Oddur sem vísar til samþykktar kirkjuráðs fyrir tveimur vikum og greinargerðar sem þá var lögð fram.

Í henni kemur fram að tekjur kirkjumálasjóðs hafi dregist verulega saman.

„Skýrar vísbendingar hafa komið fram um að markaðsverð eigna við þann hluta Laugavegar sem Kirkjuhúsið stendur við sé um þessar mundir allt að ein milljón króna fyrir hvern fermetra í verslunarrýmum og mjög hátt fyrir skrifstofuhúsnæði. Fjárbinding kirkjumálasjóðs í þessari eign sinni er því mjög mikil og full ástæða til að huga að því að losa um hana.

Binda frekar fé sjóðsins í eignum sem nýtast í kirkjulegu starfi en leysa þörf fyrir skrifstofurými biskupsembættisins og tengdra aðila með minni tilkostnaði,“ segir í greinargerðinni.

Þess má geta að allir kirkjuráðsmenn samþykktu að setja húsið á sölu nema forseti kirkjuráðs sem sat hjá. Forseti kirkjuráðs er Agnes Sigurðardóttir biskup. 

Fréttin birtist fyrst í Fréttablaðinu