Umsóknum um kennaranám fjölgaði um 30 prósent milli ára

Umsóknum um grunnskólakennaranám við Háskóla Íslands fjölgaði um 30 prósent milli ára. Þá er viðskiptafræði enn vinsælasta grein innan skólans og mikil aukning varð jafnframt í umsóknum um nám í læknisfræði og sjúkraþjálfun. Þetta kemur fram í frétttilkynningu frá Háskóla Íslands.

Umsóknarfrestur um grunnnám rann út 5. Júní en af þeim 7300 umsóknum sem bárust voru umsóknir um grunnnám 4450. Mikil aukning hefur orðið í umsóknum um grunnskólakennslu, eða 30 prósent frá því í fyrra. 130 sóttu um nám í grunnskólakennslu fyrir skólaárið 2017-2018 en rétt um 100 umsóknir bárust í fyrra.

Vinsælasta grein innan Háskóla Íslands er sem fyrr viðskiptafræði en 355 sóttu um nám í greininni fyrir skólaárið 2017-2018. Þá hefur áhugi á inntökuprófum í læknisfræði og sjúkraþjálfun aukist en nær fjórðungsaukning varð í fjölda þeirra sem þreyttu prófin á milli ára, eða um 23 prósent. Í ár sóttu 311 um í læknadeild og 56 í sjúkraþjálfun.

Þá er mikil aðsókn í íþrótta- og heilsufræði sem flutt var til Reykjavíkur frá Laugarvatni í fyrra.

Á hugvísindasviði er íslenska sem annað mál vinsælasta greinin en 440 umsóknir af 1040 bárust um BA-nám eða styttra hagnýtt nám í þeirri námsleið. Þá ber til annarra tíðinda á hugvísindasviði en kennsla í tungumálum við Háskóla Íslands mun nær alfarið fara fram í nývígðri Veröld – húsi Vigdísar á næsta skólaári.

Um fjórðungur nýrra nemenda á verkfræði- og náttúruvísindasviði mun svo hefja nám í tölvunarfræði í haust eða um 200 manns.

Rétt um 4000 nemendur brautskráðust frá framhaldsskólum landsins síðustu áramót og í vor en ljóst er að nokkur fjöldi þeirra hyggur á háskólanám við HÍ í haust.