Gengi hlutabréfa í Icelandair rýkur upp

Gengi hlutabréfa í Icelandair Group hefur rokið upp eftir að markaðir opnuðu í morgun en þegar þetta er skrifað hefur það hækkað um 7,73 prósent og nema viðskipti með bréfin 269 milljónum króna.

Hækkunina má vafalítið rekja til þess að fyrirtækið kynnti ársfjórðungsuppgjör sitt í gær en samkvæmt því jukust heildartekjur Icelandair Group um 5 prósent milli ára. Þær námu 222,4 milljónum bandaríkjadala eða sem samsvarar 23,8 milljörðum króna.

Þá tvöfölduðust tekjur af hótelgistingu milli ára. Þær voru 10,4 milljónir bandaríkjadala í ár samanborið við 5,4 milljónir dala á fyrsta ársfjórðungi ársins 2016.

Farþegum í millilandaflugi fjölgaði svo um 14 prósent og var fjölgunin mest í flugum yfir Atlantshafið eða um 40 prósent.

Í byrjun febrúar sendi Icelandair Group svarta afkomuviðvörun til Kauphallar Íslands. Hlutabréf í félaginu lækkuðu þá strax í kjölfarið um 24 prósent.