Ógildir sjálfstæðisyfirlýsingu Katalóníu

Stjórnlagadómstóll Spánar ógilti í dag sjálfstæðisyfirlýsingu héraðsþings Katalóníu líkt og búist hafði verið við.

Héraðsþing Katalóníu lýsti yfir sjálfstæði þann 27. október í kjölfar atkvæðagreiðslu á þinginu þar sem sjötíu þingmenn greiddu atkvæði með sjálfstæði, tíu gegn og tveir sátu hjá. Sambandssinnar á héraðsþinginu sniðgengu að stærstum hluta atkvæðagreiðsluna.

Leiðtogar Spánarstjórnar sögðu atkvæðagreiðsluna stríða gegn stjórnarskrá landsins og var forseti héraðsstjórarinnar, Carles Puigdemont, í kjölfarið vikið frá.

Puigdemont ferðaðist síðar til Brussel og gaf ríkissaksóknari Spánar út alþjóðlega handtökuskipun gegn honum og fjórum fyrrverandi ráðherrum héraðsstjórnarinnar.

Puigdemont var sleppt í Belgíu síðastliðinn sunnudag gegn tryggingu.