Kæra Apple fyrir að hægja viljandi á iPhone-snjallsímum

Tveir Ísraelar hafa kært tæknifyrirtækið Apple fyrir að plata notendur símanna til að kaupa sér nýjustu gerð símans með því að hægja viljandi á eldri útgáfum. RT greinir frá.

Apple staðfesti í síðustu viku grunsemdir margra um að fyrirtækið hægji viljandi á eldri gerðum iPhone-snjallsíma. Þeirri kenningu hefur verið haldið á lofti undanfarin ár að fyrirtækið hægi viljandi á eldri gerðum síma til þess að ýta undir kaup á nýrri gerð. Fyrirtækið gaf upp að ástæðan væri sú að gæði rafhlaðna í eldri símum rýrni með tímanum.

Um er að ræða fyrstu kæruna sem fyrirtækið fær á sig eftir að staðfesta þennan grun kaupenda. Í kærunni kemur fram að Apple hafi meðvitað leynt upplýsingum frá notendum og að það leiki enginn vafi á því að þær upplýsingar, að síminn hægi umtalsvert á sér þegar stýrikerfi er uppfært, séu mikilvægar. Þá segir stefnandi að notendur eigi rétt á að fá þær upplýsingar frá Apple áður en þeir uppfæri stýrikerfin.