Bakarameistarinn hagnast um 50 milljónir

Bakarameistarinn, sem rekur verslanir á sjö stöðum á höfuðborgarsvæðinu, hagnaðist um tæplega 51 milljón króna á síðasta ári, samanborið við tæplega 52 milljónir árið 2015. Hagnaðurinn helst því nær óbreyttur. Þetta kemur fram í nýbirtum ársreikningi félagsins.

Velta félagsins nam rúmum 1.060 milljónum króna í fyrra og jókst um liðlega 120 milljónir frá árinu 2015.

Heildareignir félagsins undir árslok 2016 námu tæplega 350 milljónum króna. Eigið fé var um 160 milljónir.

Áætlanir félagsins gera ráð fyrir nokkuð svipaðri afkomu árið 2017. Stærsti hluthafi Bakarameistarans  er Sigþór Sigurjónsson með 95 prósenta hlut.​ Sigþór er sem kunnugt er faðir Kolbeins Sigþórssonar, landsliðsmanns í knattspyrnu.