Útgáfufélagið Heimur tapaði 32 milljónum í fyrra

Útgáfufélagið Heimur tapaði 31,8 milljónum króna í fyrra, að því er fram kemur í nýbirtum ársreikningi félagsins. Var eigið fé útgáfufélagsins neikvætt upp á tæpar 140 milljónir í lok ársins.

Félagið er dótturfélag Talnakönnunar sem er í liðlega 75 prósenta eigu barna Benedikts Jóhannessonar fjármálaráðherra, þeirra Jóhannesar, Jóns og Steinunnar. Benedikt hætti sem framkvæmdastjóri Heims um síðustu áramót og við tók sonur hans Jóhannes.

Félagið hefur á þessu ári selt öll tímarit sín, þar á meðal viðskiptatímaritið Frjálsa verslun, sem selt var til Mylluseturs, Vísbendingu, Iceland Review og Ský.

Rekstrartekjur Heims námu 206 milljónum króna í fyrra en rekstrargjöld voru tæplega 246 milljónir. Námu eignir félagsins 41,5 milljónum króna í lok ársins og var eiginfjárhlutfallið þá neikvætt um 336,7 prósent.