Nokkuð ákveðin sunnanátt í dag: Byljóttur vindur á Snæfellsnesi

Á norðanverðu Snæfellsnesi verður byljóttur vindur í allan dag og hviður allt að 30-35 m/s. Einnig á stöku stað á Vestfjörðum og Ströndum, svo sem í Ísafjarðardjúpi.

Lægir ekki að gagni á þessum slóðum fyrr en í nótt og í fyrramálið.

Í hugleiðingu veðurfræðings á vef Veðurstofu Íslands kemur fram að hlýr loftmassi sé yfir landinu, ættaður langt sunnan úr höfum. Loftið er einnig rakt og má búast við súld eða rigningu á vesturhelmingi landsins í dag með hita á bilinu 11 til 15 stig. Austan megin er þurrara veður og gæti hitinn þar náð að gægjast yfir 20 stigin þar sem best lætur. Einnig ber að geta þess að sunnanáttin í dag er nokkuð ákveðin, búist er við hvössum vindstrengjum og snörpum hviðum á Snæfellsnesi, Vestfjörðum og Norðvesturlandi. 

Á morgun ræður sunnanáttin áfram ríkjum. Bjart og hlýtt veður á Norður- og Austurlandi. Þungbúið og svalara annars staðar og nokkuð drjúg rigning vestan til á landinu seinnipartinn þegar kuldaskil ganga á land.

Framan af næstu viku er útlit fyrir fremur rólega suðlæga átt og vætu með köflum, einkum sunnan- og vestanlands. Hitatölur síga smám saman niður að meðaltali árstímans.

Veðurhorfur á landinu næstu daga

Á mánudag:

Suðaustan 5-10 og rigning með köflum, hiti 10 til 13 stig. Þurrt að kalla NA-til með hita að 18 stigum.

Á þriðjudag:

Sunnan 5-10 og víða rigning eða skúrir. Hægari og úrkomuminna síðdegis. Hiti 9 til 16 stig, hlýjast NA-lands.

Á miðvikudag:

Breytileg átt og sums staðar skúrir, en rigning á NA- og A-landi seinni partinn. Hiti 7 til 12 stig.

Á fimmtudag:

Sunnanátt með skúrum SV- og V-lands, en léttir til á N- og A-landi. Hiti breytist lítið.

Á föstudag:

Suðaustanátt og bjartviðri N-til á landinu, en súld eða rigning S-lands.