Legoland færir út kvíarnar

Mikill vöxtur hefur verið í rekstri Legoland-garðanna á fyrstu sex mánuðum ársins. Nýr skemmtigarður var opnaður og eldri skemmtigarðar hafa vaxið og dafnað. Þetta sýnir nýr árshluta­reikningur Merlin Entertainments Group, eiganda Legoland, sem vísað er í á vef Danmarks Radio.

„Heimsóknum hefur fjölgað í alla garðana okkar,“ segir í tilkynningu með árshlutareikningnum. Við nutum góðs af sterkum páskum, góðum vörum og tekjum af myndinni The Lego Batman Movie,“ segir í tilkynningunni.

Nýr Lego-skemmtigarður var opnaður í Japan í apríl. Nú þegar hafa milljón manns heimsótt garðinn og meira en 70 þúsund árskort verið seld.

Rekstrarhagnaður af Lego-skemmtigörðunum nam 700 milljónum danskra króna á fyrri hluta ársins. Það jafngildir átta milljörðum íslenskra. Það er aukning um 29 prósent frá fyrra ári. Til stendur að halda áfram að færa út kvíarnar og verða tveir nýir skemmtigarðar opnaðir fyrir árið 2020.