Mamma Bellu og Gigi Hadid leiðbeinir fyrirsætum í nýjum raunveruleikaþætti

Yolanda Hadid var ekki aðeins heimsfræg fyrirsæta þegar hún var ung heldur hefur hún einnig alið upp þrjár ofurfyrirsætur. Börnin hennar Gigi, Bella og Anwar Hadid hafa öll verið að gera það gott í tískuheiminum seinustu ár. 

Það á því vel við að Yolanda byrji með sinn eigin raunveruleikaþátt þar sem hún leiðbeinir ungum fyrirsætum. Þátturinn mun heita Model Moms. Hún hefur mikla reynslu þegar það kemur að raunveruleikaþáttum en hún er þekktust fyrir Real Housewifes og Beverly Hills. 

Í þáttunum munu fyrirsætur sem og mömmur þeirra sem vilja starfa sem umboðsmenn dætra sinna taka þátt í átta vikna þjálfun sem á að undirbúa þær fyrir harðan heim tískunnar. Í hverri viku mun svo einn keppandi eiga kost á að vinna sér inn 5.000 dollara til þess að nota í að byggja upp ferilinn. Sú fyrirsæta sem mun standa uppi sem fyrirsæta mun svo eiga tækifæri á að fara á samning hjá IMG Models, sem er einmitt sama fyrirsætuskrifstofa sem börnin hennar Yolanda eru hjá sem og Kate Moss, Joan Smalls og Ashley Graham.