Viðurkennt að rök hnígi að sýknu

Dómsmál Kristján Viðar Júlíusson, Sævar Marinó Ciesielski, Tryggvi Rúnar Leifsson, Albert Khan Skaftason og Guðjón Skarphéðinsson hafa fengið ósk sína uppfyllta um endurupptöku hæstaréttardóms frá árinu 1980 um að hafa orðið Guðmundi Einarssyni og Geirfinni Einarssyni að bana árið 1974. Beiðni Erlu Bolladóttur, Kristjáns Viðars og Sævars Marinós er hafnað um endurupptöku um rangar sakargiftir.

„Það hefði komið mér mjög á óvart ef staðið hefði til að taka það upp aftur,“ segir Magnús Leopoldsson, sem sat í einangrun í 105 daga sem saklaus maður vegna rangra sakargifta. „Það er ekkert grín að vera í algjörri einangrun í Síðumúlafangelsinu og fá ekki að fara undir bert loft. Þetta er svona næsti bær við að drepa mann.“

Magnús var einn fjögurra svokallaðra klúbbmanna sem hafðir voru fyrir rangri sök og voru hnepptir í varðhald. Þetta hafi verið mjög erfið lífsreynsla og fylgt honum alla tíð síðan. „Ég held ég muni það rétt að sjö eða átta sinnum bar Erla mig röngum sökum auk þess sem Sævar og öll hin báru mig einnig röngum sökum,“ bætir Magnús við.

Ragnar Aðalsteinsson, lögmaður Erlu Bolladóttur og Guðjóns Skarphéðinssonar, segir niðurstöðu nefndarinnar að taka upp dóma er snúa að Guðmundi og Geirfinni rökrétta. Hinsvegar segir hann erfitt að horfa upp á að Erla sé skilin eftir.

„Ég er að sjálfsögðu ánægður með að allt sem lítur að mannshvörfunum er endurupptekið. Hinsvegar er ég jafn ósáttur við þá niðurstöðu nefndarinnar að ekki skuli endurupptekinn sá hluti málsins sem lítur að röngum sakargiftum á hendur svokallaðra klúbbmeðlima,“ segir Ragnar. „Þetta er svo samtvinnað að það er ekki hægt að greina einn þátt út úr þessu og athuga hann sérstaklega.“

Í upphafi varnar sagði settur ríkissaksóknari, Davíð Þór Björgvinsson, það skoðun sína að ekki væru skilyrði fyrir endurupptöku máls Erlu Bolladóttur. Ragnar bendir á að saksóknari hafi skipt um skoðun í málflutningi fyrir endurupptökunefnd og það sé bókað í fundargerð þess fundar. Það hafi sem sagt að endingu verið afstaða ríkissaksóknara að taka ætti upp mál Erlu einnig.

„Endurupptökunefnd nýtir sér hinsvegar í röksemdum sínum upphaflegu afstöðu saksóknara og er það megingalli. Það hlýtur að skipta öllu máli hver afstaða ákæruvaldsins er. Þegar ákæruvald fellst á endurupptöku er lítið hægt að gera en að fara að vilja þess,“ bætir Ragnar við.

Kristín Anna Tryggvadóttir, dóttir Tryggva Rúnars Leifssonar, segir gleðiefni að þessum áfanga sé loksins lokið en Tryggvi Rúnar lést árið 2011. „Þetta er mikið gleðiefni auðvitað. Nú er loksins komin einhver viðurkenning á því að brotið var á þeim á sínum tíma. Það er áfellisdómur yfir lögreglu og dómsvaldi þess tíma hvernig það hélt á málinu. Meðferðin á þessu fólki sem fékk dóma var ósanngjörn og óréttlát,“ segir Kristín Anna sem lofar störf endurupptökunefndarinnar.

„Ég er mjög þakklát vinnu nefndarinnar. Nefndin hefur legið yfir þessu í mörg ár og það hlýtur að hafa krafist hugrekkis að senda frá sér svona skýra afstöðu um endurupptöku. Það er aðdáunarvert og fyrir það ber að þakka,“ bætir Kristín Anna við.

Fréttin birtist fyrst í Fréttablaðinu.