„Þetta var lokadagurinn á hátíðinni og ég var á leiðinni niður á klúbbinn. Það var eiginlega algjör lukka að ég var ekki á staðnum,“ segir plötusnúðurinn Benedikt Sölvi Stefánsson, sem var að þeyta skífum á BPM-hátíðinni í Mexíkó, þegar byssumaður skaut fjóra til bana og særði 15 í klúbbnum Blue Parrot í bænum Playa Del Carmen. 

Í yfirlýsingu frá bæjaryfirvöldum kom fram að fimmta fórnarlambið hefði látist í troðningnum sem varð í kjölfarið. Saksóknarinn í héraðinu Quintana Roo, þar sem Playa Del Carmen er, hefur gefið út að skilaboð frá Zetas-eit­ur­lyfja­hringn­um hafi fundist á vettvangi. Þrír eiturlyfjahringir berjast um yfirráð í héraðinu, Zetas, Golfo og Los Pelones, en morðtíðni er mjög lág þar miðað við önnur héruð í landinu. Vegna ferðamanna er héraðið talið mikilvægt fyrir eiturlyfjahringina.



Árásin er sögð gríðarlegt áfall fyrir ferðaþjónustu í Mexíkó. Bæjarstjórinn í Playa Del Carmen, Cristina Torres Gómez, sagði að hátíðin yrði aldrei haldin aftur.



Eftir árásina tók Benedikt, sem kallar sig Bensöl, leigubíl yfir í næsta bæ þaðan sem flogið var til Cancun en skömmu síðar var þeim flugvelli lokað sem og nokkrum öðrum í héraðinu. „Þó ég hafi ekki orðið vitni að árásinni þá var erfitt að komast út á flugvöll. Ég var mjög stressaður og ég hef alveg vaknað í svitabaði á næturnar. Þetta tók á og ég var feginn að komast heim,“ segir hann.

BPM-hátíðin fagnaði 10 ára afmæli í ár en rúmlega 70 þúsund manns frá 72 löndum komu til að hlusta og njóta. Benedikt segir að hún sé ákveðinn núllpunktur hjá þeim sem eru að spila og tengjast klúbbamenningu. Hátíðin tekur 10 daga og spiluðu rúmlega 400 plötusnúðar frá morgni til kvölds. „Hátíðin hefur oft verið kosin besta hátíðin og er mjög virt út um allan heim,“ segir hann.



„Þessi hátíð er búin að vera friðsæl og falleg í tíu ár og er nánast búin að byggja upp bæinn Playa Del Carmen. En þetta er Mexíkó og það er lítill munur á mafíu og stjórnvöldum. Ég var bæði að spila og líka að skoða listamenn fyrir Secret Solstice-hátíðina. Ég þurfti því að vera á mörgum stöðum og ég átti að vera á Blue Parrot. Eftir árásina var hverfum lokað og það var ráðist meðal annars á lögreglumenn. Ég öskraði bara á leigubílstjórann að drífa sig og hann keyrði helvíti greitt út á völl. Það kom mér heim.“



Í kjölfar handtöku eit­ur­lyfja­baróns­ins Joaquíns „El Chapo“ Guz­mán, sem var foringi Sinaloa-eit­ur­lyfja­hringsins, hafa aðrir eiturlyfjahringir verið að sýna mátt sinn og megin. Margir erlendir fréttamiðlar fullyrða að mafíustríð geisi í landinu. 



Fréttin birtist fyrst í Fréttablaðinu.