Fínasta skíðaveður um helgina en stormur á þriðjudag

Fólk getur svo sannarlega drifið sig í skíðagallann því búist er við fínu skíðaveðri um helgina. Samkvæmt vakthafandi veðurfræðingi, Þorsteini V. Jónssyni, er því um að gera að grípa gæsina á meðan hún gefst þar sem búist er við umhleypingum eftir helgi með stormi á þriðjudag.

„Það er fínasta veður um helgina. Svolítil snjómugga á norður og austurlandi í dag og  þokkalegt á morgun en svolítill austan strekkingsvindur við suðausturströndina og él á morgun.“

Eftir helgi verður blanda af allri veðráttu samkvæmt Þorsteini. Hvassviðri, rigning og hitabreytingar munu láta á sér kræla. Þorsteinn bendir þó á að það verði hvassviðri og stormur á þriðjudaginn næstkomandi og að hvassast verði Norð-Vestan til.

Hér að neðan má sjá veðurspá Veðurstofu Íslands fram á föstudag í næstu viku.

Veðurhorfur á landinu

Norðan 8-13 m/s, en 13-18 austast. Víða léttskýjað á sunnanverðu landinu, annars snjókoma eða él, einkum NA-lands en dregur úr vindi og ofankomu í kvöld. Kólnandi veður. Austan 5-13 og stöku él á S- og SV-landi á morgun, vægt frost. Hægari vindur í öðrum landshlutum, bjartviðri og talsvert frost. Spá gerð: 28.01.2017 09:40. Gildir til: 30.01.2017 00:00.

Á mánudag: Austanátt, víða 8-13 m/s en 13-18 með S-ströndinni. Slydda og síðar rigning, einkum SA-til, en þurrt N-til á landinu. Hlýnandi veður. Hvöss norðaustanátt um kvöldið og talsverð rigning eða slydda SA- og A-lands. 

Á þriðjudag: Austlæg átt 15-25 m/s, hvassast NV-til. Lægir smám saman á N- og A-landi. Rigning, einkum S-til á landinu, en slydda eða snjókoma á Vestfjörðum. Hiti 0 til 7 stig. 

Á miðvikudag:Austlæg átt og smáskúrir eða él, en léttskýjað á N-verðu landinu. Hiti kringum frostmark.

Á fimmtudag og föstudag:Líklega austlæg átt með rigningu eða slyddu, en úrkomulítið N-lands. Spá gerð: 28.01.2017 08:34. Gildir til: 04.02.2017 12:00.

Hugleiðingar veðurfræðings

Stíf norðanátt á landinu í dag og hvassast verður við austurströndina. Snjókoma norðan- og austanlands og síðar él, en léttskýjað sunnan- og suðvestanlands. Dregur úr vindi og ofankomu í kvöld og nótt og kólnar. Víða fremur hægur vindur og nokkuð bjart á morgun, en kalt í veðri. Hvassara verður þó sunnan- og suðvestantil, sums staðar él og nær hitinn víða að fara upp fyrir frostmark við ströndina. Austlægar áttir eftir helgi, bætir í vind og úrkomu og hlýnar smám saman, en áfram kalt og snjókoma norðvestantil.