Ríkið kaupir jörðina Fell við Jökulsárlón

Ríkissjóður ákvað í dag að nýta forkaupsrétt vegna jarðarinnar Fells í Suðursveit á grundvelli laga um náttúruvernd, en jörðin er á náttúruminjaskrá og liggur við Jökulsárlón, einn vinsælasta ferðamannastað landsin.

Greint er frá kaupunum á vef fjármála-og efnahagsráðuneytisins en jörðin var í haust seld á nauðungarsölu til slita á sameign að beiðni eigenda.

Söluverðið var 1520 milljónir króna og gengur ríkissjóður inn í kaupin á því verði en gert var ráð fyrir kaupunum í fjáraukalögum seinasta árs.

Í nóvember síðastliðnum var greint frá því að Fögrusalir ehf. hefðu keypt jörðina á 1520 milljónir króna. Ríkið átti hins vegar forkaupsrétt á jörðinni, eins og áður segir, og hefur nú ákveðið að nýta hann.