Selja Rosenberg eftir fimm mánaða rekstur

Ólafur Örn Ólafsson og Kári Sturluson hafa selt veitinga- og tónleikastaðinn Rosenberg við Klapparstíg. Ólafur og Kári keyptu reksturinn í febrúar á þessu ári og opnuði staðurinn í nýrri mynd í apríl síðastliðnum.

Ólafur tilkynnti um söluna á Facebook síðu sinni í dag. Þar segir hann að reksturinn hafi ekki gengið nógu vel, en vill ekki fara út í ástæður sem liggi þar að baki.

„Það er bara búið að selja staðinn og við það situr,“ segir Ólafur í samtali við Vísi.

Hann vildi aðspurður ekki tjá sig um hverjir nýir eigendur staðarins væru eða hvaða ástæður liggi að baki ákvörðuninni. Þá vildi hann ekki svara því hvort staðnum yrði lokað vegna sölunnar.

Samkvæmt heimildum Vísis hefur starfsfólki staðarins ýmist verið sagt upp eða það hætt vegna vangoldinna launa.

Milljónirnar sem hurfu

Kári Sturluson, annar fráfarandi eigenda, hefur um árabil starfað með tónlistarmönnum og kvikmyndargerðarfólki á Íslandi. Hefur hann meðal annars annast málefni hljómsveitarinnar Sigur Rósar frá árinu 2005.

Frá því var greint í september að 35 milljónir króna hefðu horfið úr miðasölu fyrir tónleikaröð Sigur Rósar í Hörpu.

Var greint frá því í Fréttablaðinu að Kári hafi fengið 35 milljóna króna fyrirframgreiðslu af miðasölu tónleikanna hjá forstjóra Hörpu, Svanhildi Konráðsdóttur. Þeim peningum virtist Kári síðan hafa ráðstafað í annað sem er viðburðinum og hljómsveitinni með öllu óviðkomandi.

Svanhildur sór af sér alla aðkomu að málinu. Hún sagði að Harpa gerði samninga við tónleikahaldara sem væru að fullu ábyrgir fyrir þeim viðburðum. Þeir ættu miðasölu af þeim viðburði sem þeir séu ábyrgir fyrir og að samningar tónleikahaldara við listamenn væru án aðkomu eða ábyrgðar Hörpu.