Ekkert ferðaveður á morgun

Ekkert ferðaveður verður á morgun þegar suðaustan stormur gengur yfir landið. Þeir sem hyggja á ferðalög á milli landshluta ættu því að íhuga að flýta brottför eða seinka henni til þriðjudags því búist er við að akstursskilyrði verði slæm.

„Í dag ættu sem flestir að nýta góða veðrið til að gera það sem þeim þykir skemmtilegt, því að á morgun annan í páskum er gert ráð fyrir suðaustan stormi með snjókomu eða slyddu og síðar rigningu,“ segir á vef Veðurstofunnar.

Búast má við norðvestlægri átt í dag, 5 til 13 metrum á sekúndu, og éljum um landið norðaustanvert. Annars hægari og léttskýjað sunnan- og vestanlands. Frost 0 til 6 stig, en hiti 1 til 5 stig sunnanlands að deginum.

Vaxandi suðaustanátt í nótt, 13 til 20, og slydda eða snjókoma í fyrramálið, fyrst vestantil en 15 til 25 í kringum hádegi. Hlýnar smám saman og fer að rigna um landið vestanvert seinnipartinn, einkum á láglendi. Hægari og þurrt að kalla norðaustantil fram á kvöld. Hiti víða 2 til 7 stig seint annað kvöld.

Veðurútlit fyrir nokkrar leiðir á morgun annan páskadag, að því er fram kemur á vef Vegagerðarinnar:

Hellisheiði: Fer að snjóa á milli kl. 9 og 10.  Hvessir og frá því um hádegi verður hríðarveður og lítið skyggni á háheiðinni fram undir kvöld, en hlánar síðan.

Holtavörðuheiði: Hvessir síðdegis, einkum eftir kl. 16. Vindhraði 16-18 m/s og snjóar.  20-23 m/s um tíma annað kvöld og þá mjög blint.

Steingrímsfjarðarheiði og Klettsháls: Bærilegasta veður verður fram á miðjan dag en hvessir og með ofanhríð.  Kafaldsbylur í eftirmiðdaginn og fram á kvöld. Austan 17-22 m/s og skyggni mjög lítið.

Öxnadalsheiði:  Fínasta veður fram eftir degi, en snjóar frá um kl. 17-18.  Hvasst og með skafrenningi og blindu síðdegis og annað kvöld.

Hafnarfjall og utanvert Kjalarnes:  Frá um kl. 14 til 15 er reiknað með hviðum allt að 35-40 m/s.  Vindur verður í hámarki um kl. 18. Eins á norðanverðu Snæfellsnesi.