Gagnrýna niðurskurð á samgönguáætlun: „Þjóðvegurinn er hættulegasti ferðamannastaður landsins“

Helga Árnadóttir, framkvæmdastjóri Samtaka ferðaþjónustunnar, segir það með ólíkindum að enn og aftur sé verið að ýta út af borðinu nauðsynlegum samgönguframkvæmdum sem ferðaþjónustan hefur ítrekað kallað eftir en í gær sendu samtökin frá sér nokkuð harðorða yfirlýsingu þar sem lýst er miklum vonbrigðum með boðaðan niðurskurð á samgönguáætlun.

Í yfirlýsingunni er því velt upp hvort að íslenska ríkið sé helsti gullgrafari ferðaþjónustunnar þar sem skammtímagróði ræður för en ekki sé horft til framtíðar.

„Rétt er að benda á að gangi áætlanir eftir hvað varðar gjaldeyrissköpun ferðaþjónustunnar á þessu ári má ætla að nýjar tekjur ríkisins af greininni muni nema um 20 milljörðum kr. á árinu. Þannig munu þjónustu- og skatttekjur ríkissjóðs af ferðaþjónustunni í heild sinni fara úr 70 milljörðum í 90 milljarða á þessu ári,“ segir í yfirlýsingunni.

Samgöngur lífæð ferðaþjónustunnar

Helga segir að ef menn ætli að tryggja verðmætasköpun til lengri tíma þá þurfi að byggja upp innviði, hvort sem um sé að ræða samgöngur eða aðra innviði.

„Samgöngur eru lífæð ferðaþjónustunnar og undirstaða hagsældar okkar allra. Við teljum með ólíkindum að það sé enn og aftur verið að ýta út af borðinu nauðsynlegum samgönguframkvæmdum sem ferðaþjónustan hefur ítrekað kallað eftir. Þetta er lífæð ferðaþjónustunnar vegna þess að við þurfum að fá ferðamenn til að fara víðar um landið og það allan ársins hring og þá þurfa vegir að vera greiðfærir allt árið,“ segir Helga í samtali við Vísi og bætir við að svæðin úti á landi eigi því mikið undir því hvað varðar dreifingu og álagsstýringu. Úrbætur í samgöngumálum séu þar lykilatriði.

Þá bendir Helga jafnframt á að undanfarin ár hafi ekki verið sett nægt fjármagn í að viðhalda vegum landsins svo vegakerfið sé í raun að grotna niður.

Uppbygging innviða í ferðaþjónustunni nýtist öllum í landinu

„Ef menn ætla að tryggja hagsæld til framtíðar þá þarf að byggja upp hvort sem það eru samgöngur eða aðrir innviðir þá þýðir ekki að láta stundargróða ráða för. Ríkið hefur haft miklar tekjur í formi skatta og þjónustugjalda af ferðaþjónustunni undanfarin ár. Ef menn ætla hins vegar ekki að byggja upp og tryggja þannig þau gæði og grunn sem er nauðsynlegur til framtíðar þá geta menn ekki vænst verðmætasköpunar og þannig velferðar fyrir okkur öll til lengri tíma. Þess vegna veltir maður því upp hvort að íslenska ríkið sé helsti gullgrafari ferðaþjónustunnar,“ segir Helga.

Hún bendir einnig á að ferðaþjónustan eigi það sameiginlegt með almenningi í landinu að innviðauppbyggingin til handa ferðaþjónustunni nýtist öllum sem hér búa.

„Þetta er bara orðið þannig að þjóðvegurinn er hættulegasti ferðamannastaður landsins og við erum jú öll að fara um þjóðveginn. Við eigum því öll mikið undir því að samgöngukerfið verði bætt; heimamenn, innlendir ferðamenn sem og erlendir gestir.“

Nauðsynlegt að fara strax í úrbætur á Dettifossvegi og á veginum um Berufjörð

Mikið hefur verið rætt um nauðsynlegar úrbætur sem gera þarf á tveimur vegum þar sem fjöldi ferðamanna fer um ár hvert, annars vegar á Dettifossvegi og hins vegar á veginum um Berufjörð sem er ómalbikaður og er hluti af hringveginum.

Helga segir nauðsynlegt að ráðast í úrbætur á báðum þessum vegum og hafa samtökin ítrekað kallað eftir þeim.

„Til dæmis með Dettifossveg þá hefur þar orðið meiri meðaltalsaukning umferðar en annars staðar á landinu síðustu misseri. Við eigum sannarlega segla á þessu svæði eins og Dettifoss og Ásbyrgi.  Hringakstur um svæðið þarf að vera greiðfær allt árið um kring en þannig náum við þeirri dreifingu og álagsstýringu sem er svo eftirsótt, rétt eins og annars staðar um landið.“

Helga nefnir einnig veginn um Berufjörð og Uxahryggjaveg frá Borgarfirði yfir á Þingvelli.

„Þessar samgöngubætur nýtast til að dreifa álagi og því er þessi niðurskurður gríðarlega mikil vonbrigði. Þessa innviði verður að byggja upp til að tryggja þau gæði og þann grunn sem nauðsynlegur er til að byggja á til framtíðar. Við skulum ekki gleyma því að verðmætasköpun er grunnur hagsældar og þannig velferðar allra landsmanna.“