Messi greiðir hugsanlega sekt til að komast af skilorði

Argentínumaðurinn Lionel Messi gæti komist af skilorði á Spáni ef samkomulag næst um að hann greiði sekt.

Messi var dæmdur til 21 mánaða fangelsisvistar sem er í raun bara skilorðsbundinn dómur þar sem enginn fer í fangelsi á Spáni sem fær undir tveggja ára fangelsisdóm.

Messi og faðir hans voru dæmdir sekir fyrir skattsvik. Þeir voru sagðir hafa skotið undan tæpum 500 milljónum króna á árunum 2007 til 2009.

Saksóknari í Barcelona fann út að þeir hefðu verið að fela peninga í skattaskjólum í Belize og Úrúgvæ. Þeir feðgar voru dæmdir til þess að greiða samtals 400 milljón króna sekt. Þeir greiddu svo viljandi einar 580 milljónir króna í viðbót til þess að koma til móts við saksóknara.

Nú er saksóknari til í að sleppa Messi af skilorðinu ef hann greiðir litlar 30 milljónir króna í viðbót til yfirvalda. Það gera 45 þúsund krónur fyrir hvern dag sem hann átti að vera á skilorði.