Íslenska fyrirtækið Endor verðlaunað af Hewlett Packard

Uppýsingafyrirtækið Endor hlaut nú á dögunum Hector verðlaunin frá Hewlett Packard Enterprise (HPE) sem hástökkvari ársins 2017. Eru verðlaunin veitt fyrir mestan vöxt samstarfsaðila HPE í Danmörku og Íslandi á árinu 2017 samanborið við árið á undan.

Í umsögn dómnefndar kemur fram að Endor hljóti verðlaunin fyrir mikinn vöxt á árinu 2017 og þá einkum í tengslum við gagnageymslulausnir, en Endor var einn söluhæsti samstarfsaðilinn í Evrópu á sölu lausna frá birgjanum Nimble Storage sem HPE keypti nýlega. Þar kemur einnig fram að Endor sé með mikla þekkingu á miðlægum búnaði og gagnaverstengdum lausnum, skilji þarfir viðskiptavina og þær umbreytingar sem eru að eiga sér stað og veiti viðskiptavinum gæðaráðgjöf varðandi val á viðeigandi lausnum. 

Þrír af stofnendum Endor, Guðbrandur R. Sigurðsson, Arnar Kjærnested og Davíð Þ. Kristjánsson, veittu verðlaununum viðtöku í árlegum viðhafnarkvöldverði til heiðurs samstarfsaðilum HPE í Kaupmannahöfn.

Endor er ráðgjafar- og þjónustufyrirtæki sem sérhæfir sig í að hámarka rekstrarhagkvæmni fjárfestinga í upplýsingatækni og nýtir til þess nýjustu tækni í sjálfvirknivæðingu.

Meðal viðskiptavina fyrirtækisins eru Íslandsbanki, RÚV, Ölgerðin og Íslandshótel. Auk þess sinnir Endor franska upplýsingatæknifyrirtækinu ATOS, sem sinnir til að mynda lykilhlutverki varðandi upplýsingatæknimál Ólympíuleikanna.