Líkur á eldingum í skúrabólstrum í dag

Búast má við skúrum víða um land í dag og næstu daga þar sem lægðardragið sem hefur hreiðrað um sig yfir miðju landinu virðist ekki vera á förum á næstunni. Þessu lægðardragi fylgir óstöðugt loft og því líkur á skúrum um landið allt en þeim gætu fylgt eldingar.

„Ef það verður einhverstaðar þá verður það í þessum skúrabólstrum sem geta orðið háreistir,“ segir Haraldur Eiríksson, veðurfræðingur hjá Veðurstofu Íslands, um líkurnar á eldingum í dag.

Óstöðugt loft var einnig yfir landinu í gær og fylgdu því skúrir en hins vegar engar eldingar. Á vef Veðurstofu Íslands er að finna eldingaspá sem sýnir veltimætti (Cape). Veltimætti er mælikvarði á lóðréttan óstöðugleika lofts en eftir því sem loftið er óstöðugra eykst hætta á myndun skúraflóka og við mikinn óstöðugleika er hætta á þrumuveðri.

Veðurhorfur á landinu næstu daga

Á fimmtudag:

Hæg norðlæg eða breytileg átt og skúrir, einkum um landið norðanvert. Hiti 9 til 16 stig, hlýjast syðst á landinu.

Á föstudag:

Hæg breytileg átt, skýjað með köflum og dálitlir skúrir á víð og dreif, en fer að rigna á Suðausturlandi undir kvöld. Hiti víða 10 til 15 stig.

Á laugardag:

Norðlæg átt 3-8 m/s og rigning eða skúrir, en þurrt og bjart um landið vestanvert. Hiti 10 til 15 stig.

Á sunnudag:

Norðaustlæg eða austlæg átt með rigningu sunnan heiða, en úrkomulítið fyrir norðan. Hiti 7 til 16 stig, hlýjast syðst á landinu.

Á mánudag og þriðjudag:

Útlit fyrir norðanátt með rigningu norðan til á landinu og kólnar lítillega, en þurrt að mestu Sunnan- og Vestanlands og milt að deginum.