Credit Suisse segir upp tvö þúsund manns

Credit Suisse bankinn hefur tilkynnt um niðurskurð tvö þúsund starfa í alþjóðamarkaðsdeild sinni. 

Niðurskurðurinn bætist ofan á þau fjögur þúsund störf sem nú þegar er búið að tilkynna um. Bankinn áætlar að með honum geti hann sparað 5,4 til 6,6 milljarða dollara, 680 til 830 milljarða íslenskra króna, fyrir lok árs 2018. Nú þegar hefur 2.800 manns verið sagt upp.

Gengi hlutabréfa í Credit Suisse hækkaði um 2,1 prósent í morgun eftir tilkynninguna.

Eins og Vísir greindi frá hafa bankar á síðustu tólf mánuðum tilkynnt um niðurskurð 140 þúsund starfa á komandi árum.