Kleinuhringir og kannanir sammála

Það voru XD kleinuhringirnir sem seldust mest í Alhringiskosningunum á Dunkin´ Donuts, en kaffihúsið er búið að vera með hringi með kosningamerkjum flokkanna sem eru í framboði til Alþingis, í sölu undanfarna daga.

Næstir á eftir komu Píratahringirnir og í þriðja sæti voru hringir Vinstri grænna. Sigurður Karlsson, framkvæmdastjóri Dunkin´ Donuts á Íslandi, segir viðskiptavini hafa tekið vel í uppátækið.

„Þetta var skemmtilegt og fólk hafði mjög sterkar skoðanir en hvort þetta gefi einhverja vísbendingu um hvað kemur upp úr kjörkössunum á laugardaginn verður að koma í ljós. Niðurstöður kosninga geta alltaf komið á óvart og það gerir þær einmitt spennandi.“