Eigandi Jóa útherja hefur aldrei upplifað annað eins

Valdimar P. Magnússon eigandi íþróttavöruverslunarinnar Jóa Útherja var úti á landi þegar Vísir náði tali af honum núna í kvöld. Hann var því fjarri góðu gamni eins og hann orðaði það þegar verslunin var opnuð í kvöld til þess að selja íslenskar landsliðstreyjur sem komu til landsins síðdegis.

„Ég er bara það heppinn að eiga gott starfsfólk sem stóð vaktina í allri þessari vitleysu. Ég er ekki búinn að heyra frá þeim en þetta er auðvitað bara algjör Öskubuskudraumur. Við fengum á bilinu 400-500 treyjur og við eigum von á því að þær seljist upp en það kemur ekki í ljós fyrr en á morgun hvort það verður eitthvað eftir eða hvort við fáum fleiri,“ segir Valdimar í samtali við Vísi.

Hann hefur rekið verslunina frá árinu 1999 og hefur hún skapað sér sess á meðal knattspyrnuiðkenda-og áhugamanna sem ein besta búðin þegar kemur að fótboltavörum.

Valdimar segist aldrei hafa upplifað annað eins og núna í tengslum við Evrópumótið í knattspyrnu enda hefur áhuginn á íslenska karlalandsliðinu líklega aldrei verið meiri. Löng röð myndaðist við verslunina í kvöld og var hleypt inn í hollum.

„Við reyndum bara að gera gott úr þessu og við viljum auðvitað að allir fái sitt,“ segir Valdimar.

Aðspurður hvort honum finnist landsliðstreyjan flott segir hann:

„Ég er nú engin tískulögga en ég var strax hrifinn af henni þegar ég sá hana um áramótin. Ég ímyndaði mér að hún myndi slá í gegn og það hefur hún gert. Mér finnst hún ennþá flott en ég hlakka samt til að fá nýtt lúkk.“

Valdimar er ekki í vafa þegar blaðamaður fiskar upp úr honum spá fyrir leik strákanna okkar gegn Frökkum á morgun.

„Þetta fer eins og Englandsleikurinn. Við vinnum 2-1.“