Enn einn heimasigur Golden State | Myndbönd

Tíu leikir fóru fram í NBA-deildinni í nótt.

Golden State Warriors vann sinn 41. leik í röð á heimavelli þegar liðið bar sigurorð af Oklahoma City Thunder, 116-108, í Oracle Arena.

Steph Curry var að vanda stigahæstur í liði Golden State með 26 stig en hann gaf einnig 10 stoðsendingar. Harrison Barnes kom næstur með 19 stig og Klay Thompson gerði 18.

Fjörtíu stig frá Kevin Durant dugðu Oklahoma ekki til sigurs en fyrir leikinn í nótt var liðið búið að vinna fimm leiki í röð. Russell Westbrook átti einnig góðan leik með 27 stig og 12 stoðsendingar.

Golden State er á toppnum í Vesturdeildinni með 46 sigra og fjögur töp. Þar á eftir kemur San Antonio Spurs sem vann fjögurra stiga sigur, 106-102, á Los Angeles Lakers á heimavelli. Þetta var fjórði sigur San Antonio í röð.

Tim Duncan og Manu Ginobili léku ekki með San Antonio í nótt en það kom ekki að sök. LaMarcus Aldridge var stigahæstur í liði San Antonio með 26 stig en Kawhi Leonard kom næstur með 20 stig og 13 fráköst.

Kobe Bryant skoraði 25 stig fyrir Lakers, þar af 16 í 3. leikhluta.

Eftir tvo tapleiki í röð komst Cleveland Cavaliers aftur á sigurbraut með 99-84 sigri á New Orleans Pelicans.

Kyrie Irving, LeBron James og J.R. Smith voru í aðalhlutverkum hjá Cleveland en þeir skoruðu samtals 76 af 99 stigum liðsins. Irving var með 29 stig, James 27 og Smith 20.

Norris Cole var með 26 stig hjá New Orleans og Anthony Davis skilaði 24 stigum og 11 fráköstum.

Úrslitin í nótt:

Golden State 116-108 Oklahoma

San Antonio 106-102 LA Lakers

Cleveland 99-84 New Orleans

Houston 79-96 Portland

Charlotte 108-104 Washington

Indiana 112-104 Detroit

Philadelphia 103-98 Brooklyn

Memphis 110-114 Dallas

Minnesota 112-105 Chicago

Phoenix 89-98 Utah

Curry og Durant voru öflugir í nótt Gordon Hayward með rosalega troðslu Flottustu tilþrif næturinnar