Kobe Bryant lék sinn 18. og síðasta stjörnuleik í nótt þegar lið Vesturdeildarinnar bar sigurorð af liði Austurdeildarinnar, 196-173, í Toronto.
Bryant, sem leggur skóna á hilluna eftir tímabilið, var með 10 stig í leiknum í nótt og skoraði því alls 290 stig í stjörnuleikjum á ferlinum.
Bryant átti metið yfir flest stig í stjörnuleikjum en LeBron James hirti það af honum með því að skora 13 stig í leiknum í nótt.
James er nú búinn að skora 291 stig í stjörnuleikjum, einu meira en Bryant. Þriðji á blaði er svo átrúnaðargoð Bryants, sjálfur Michael Jordan, en hann skoraði 262 stig í stjörnuleikjum á sínum tíma.
Kevin Durant, leikmaður Oklahoma City Thunder, nálgast efstu menn en hann er kominn upp í 13. sætið á stigalistanum í stjörnuleikjum.
Durant skoraði 23 stig í leiknum í nótt og hefur því gert 179 stig í stjörnuleikjum á ferlinum, jafn mörg og Boston-goðsögnin John Havlicek gerði á sínum tíma. Durant er bara 27 ára og ætti því að geta komist enn ofar á listann á næstu árum.
Þótt ungur sé á Durant þó metið yfir flest stig að meðaltali í leik í stjörnuleikjum, eða 25,6 stig.
Flest stig í stjörnuleikjum NBA:
1. LeBron James - 291
2. Kobe Bryant - 290
3. Michael Jordan - 262
4. Kareem Abdul-Jabbar - 251
5. Oscar Robertson - 246
6. Bob Pettit - 224
7. Julius Erving - 221
8. Elgin Baylor - 218
9. Shaquille O'Neal - 202
10. Wilt Chamberlain - 191
Vestri
Víkingur R.
