Þórir getur jafnað gullmetið hennar Marit

Marit Breivik er sigursælasti þjálfari norska kvennalandsliðsins í handbolta en kannski ekki mikið lengur. Selfyssingurinn Þórir Hergeirsson gerir sig líklegan til að setjast við hlið hennar á toppnum eftir Evrópumótið sem stendur nú yfir í Svíþjóð.

Norska kvennalandsliðið hefur unnið fimm fyrstu leiki sína á EM 2016 og mætir Frökkum í undanúrslitum keppninnar í kvöld.

Norðmenn þurfa ekki lengur að hafa áhyggjur af Rússum, Serbum eða Svartfellingum sem eru einu þjóðirnar sem hafa slegið út norska liðið á undanförnum tíu stórmótum.

Best var líklega að losna við Ólympíumeistara Rússa sem eru eina handboltaþjóðin sem hefur unnið norsku stelpurnar í undanúrslitaleik á stórmóti á þessari öld.

Fimm sinnum hefur Þórir stýrt norsku skútunni alla leið og unnið gullið.  Takist honum það í sjötta sinn mun hann jafna met Marit Breivik. Marit Breivik naut reyndar góðrar hjálpar frá Þóri við að vinna fern af sínum sex gullverðlaunum.

Marit Breivik tók við norska liðinu árið 1994 þegar liðið hafði aldrei unnið gull á stórmóti. Tvenn silfurverðlaun á Ólympíuleikum og tvenn bronsverðlaun á HM höfðu komið í hús en undir stjórn Marit braut norska liðið ísinn þegar liðið vann gull á EM 1998. Liðið varð heimsmeistari á HM árið eftir og vann brons á Ólympíuleikunum í Sydney 2000.

Þórir hafði þjálfað norska unglingalandsliðið frá 1994 til 2001 en sumarið 2001 var hann ráðinn sem aðstoðarþjálfari Marit Breivik. Þau áttu síðan eftir að vinna saman í sjö ár og á tíu stórmótum. Uppskeran var sjö verðlaun, þar af fjögur gull.

Þórir getur því ekki aðeins jafnað gullmet Marit Breivik heldur einnig tekið þátt í að vinna sitt tíunda gull á stórmóti sem þjálfari eða aðstoðarþjálfari norska landsliðsins.

Noregur mætir Frakklandi í seinni undanúrslitaleik kvöldsins en á undan mætast Holland og Danmörk.

Franska landsliðið er ekkert lamb að leika við. Liðið hefur aðeins tapað einum leik á mótinu og það var á móti Hollendingum í lokaleik riðilsins þar sem þær frönsku voru fimm mörkum yfir í hálfleik, 12-7.

Franska liðið fór í úrslitaleikinn á Ólympíuleikunum í Ríó þar sem liðið varð að sætta sig við silfur eftir tap á móti Rússum.Noregur hefur ekki mætt Frökkum á stórmóti síðan á EM í Serbíu 2012 en þá unnu þær norsku með ellefu marka mun í leik liðanna í milliriðli.

Nokkrum mánuðum fyrr hafði norska liðið aftur á móti byrjað Ólympíuleikana í London á því að tapa með einu marki fyrir Frökkum.

Franska landsliðið hefur ekki unnið verðlaun á tveimur stórmótum í röð frá 2003 og aldrei tekið tvenn verðlaun á sama ári. Norska liðið á aftur á móti möguleika á því að taka tvenn stórmótaverðlaun á þriðja Ólympíuárinu í röð.

Þórir og norsku stelpurnar mættu hungruð til leiks á EM í ár eftir „vonbrigðin“ á Ólympíuleikunum. Brons er sigur á flestum bæjum nema hjá norska landsliðinu þar sem enginn er sáttur nema með gull um hálsinn.

Flest verðlaun þjálfara norska landsliðsins á stórmótum

Marit Breivik

13 verðlaun á 19 stórmótum á 15 árum

Þjálfaði frá 1994 til 2008

6 gull

5 silfur

2 brons

Þórir Hergeirsson

8 verðlaun á 9 stórmótum á 7 árum

Hefur þjálfað liði frá 2009

5 gull

1 silfur

2 brons



Gullverðlaun þjálfara á 9 stórmótum í tíð Þóris 2009-2016

5 - Þórir Hergeirsson (Noregur)

2 - Yevgeni Trefilov (Rússland, HM 2009 og ÓL 2016)

1 - Morten Soubak (Brasilía, HM 2013)

1 - Dragan Adzic (Svartfjallaland, Em 2012)



Undanúrslitaleikir norsku stelpnanna undir stjórn Þóris

Sem aðstoðarþjálfari Marit Breivik

Sigur á Júgóslavíu á HM 2001*

Sigur á Frakklandi á EM 2002

Sigur á Ungverjalandi á EM 2004

Sigur á Frakklandi á EM 2006

Sigur á Þýskaland á HM 2007

Sigur á Suður-Kóreu á ÓL 2008

Sigur á Rússlandi á EM 2008

Sem aðalþjálfari

Tap á móti Rússlandi á HM 2009

Sigur á Danmörku á EM 2010

Sigur á Spáni á HM 2011

Sigur á Suður-Kóreu á ÓL 2012

Sigur á Ungverjalandi á EM 2012

Sigur á Svíþjóð á EM 2014

Sigur á Rúmeníu á HM 2015*

Tap á móti Rússlandi á ÓL 2016*

* Framlengdir leikir

Samanlagt 13 sigrar í 15 undanúrslitaleikjum