Fólk komið yfir nírætt fast á bráðadeild

Fjögur hundruð sjúklingar sem komnir eru yfir nírætt voru á síðast ári fastir á bráðadeild Landspítalans í meira en sólarhring þar sem nærri allar deildir spítalans voru fullar. Yfirlæknir segir ástandið óásættanlegt. Dæmi eru um fólk dvelji á bráðadeildinni í allt að fimm sólarhringa. 

Bráðamóttaka Landspítalans í Fossvogi er sú stærsta á landinu. Þangað leita að meðaltali tvö hundruð sjúklingar á dag. Aðsókn á deilina hefur aukist mikið síðustu mánuði. 

„Síðastliðna tvo þrjá mánuði þá erum við mjög oft með 10 til 20% umfram aðsókn. Það hafa auðvitað komið dagar eins og brotadagurinn mikli þarna einn mánudaginn þar sem aðsóknin var næstum því 100% yfir venjulegan dag,“segir Hilmar Kjartansson yfirlæknir á bráðamóttöku Landspítalans í Fossvogi. 

Ekki aðeins hefur aðsóknin aukist heldur hefur verður það sífellt stærra vandamál hversu langan tíma tekur að koma sjúklingum af bráðadeildinni, á aðrar deildir spítalans, þar sem þær eru yfirfullar.

„Einstaklingar yfir nírætt. Fyrir þremur árum síðan þá voru áttatíu einstaklingar yfir allt árið sem voru í sólarhring eða lengur. Árið í fyrra þá voru þeir yfir fjögur hundruð. Þannig að það náttúrulega sýnir sig hvað þessi bið hefur aukist mikið,“segir Hilmar.

Þegar hvað mest er að gera á deildinni þá þurfa sjúklingar að liggja frammi á göngum. Hilmar segir það oft svo að helmingur sjúklinganna á deildinni sé að bíða eftir því að komast á aðrar deildir. Þeir sem bíði lengst þurfi að bíða í fimm sólarhringa. 

Hann segir ástandið á bráðadeildinni haldast í hendur við ástandið á spítalanum öllum. Flestar deildir spítalans eru yfirfullar. Stór ástæða fyrir því er sú að í dag eru um níutíu sjúklingar fastir á spítalanum sem þurfa að komast á hjúkrunarheimili en fá ekki pláss þar þar sem þau eru öll full. „Okkur finnst þetta óásættanlegt,“ segir Hilmar.