Jól

Nostrað við hátíðarborðið

Kristjana Guðbrandsdóttir skrifar
Berta með netta og aflanga skreytingu sem hentar vel á hátíðarborð sem er hlaðið veitingum.
Berta með netta og aflanga skreytingu sem hentar vel á hátíðarborð sem er hlaðið veitingum. Visir/GVA
Blómstrandi hýasintur á hátíðarborðið. Fréttablaðið/GVA
Berta Björk Heiðarsdóttir, blómaskreytir hjá Blómagalleríinu við Hagamel, segir að á jólum sé tilvalið að minna á ljósið, vorið og að brátt fari sól að hækka á lofti.

„Jólaskreytingar minna á ljós og birtu, náttúruna. Að það kemur aftur vor og að sólin hækkar á lofti,“ segir hún. Hún hefur útbúið þrjár skreytingar á hátíðarborðið. Eina borðskreytingu í aflöngum potti sem hentar vel á borð sem er hlaðið veitingum.

„Þetta er nett og falleg skreyting sem er auðvelt að koma fyrir. Í henni hef ég amaryllis, furu, mosa og svolítið glimmer. Mjó kertin gefa fallegt yfirbragð.“

Hún mælir einnig með því að skreyta með hýasintum sem eru í blóma í desember og janúar. „Ég nota sérstök glös fyrir hýasintur og skreyti á einfaldan hátt því blómin eru svo falleg,“segir Berta.





Þriðja skreytingin er viðameiri og hentar á stórt borð. „Ég nota gylltan poka úr endurunnu efni, skreyti með furu, könglum, kristþyrnisblómum og greinum. Þetta er umhverfisvænt og náttúrulegt. Mér finnst það eiga við í desember; náttúran og ljósið.“

Ítölsk jólakaka í eftirétt

Anna Soffía Ásgeirsdóttir matreiðir ofan í leikara og starfsfólk Borgarleikhússins. Hún var kokkur í mörg ár á La Primavera og í leikhúsinu prísar fólk sig sælt með hana. Anna Soffía leggur til eftirrétt sem var á matseðli La Primavera í desember, ítalska jólaköku.

„Þetta er réttur sem að við vorum með á La Primavera í desember. Þetta er ítölsk jólakaka. Rétturinn er gerður úr panettone-kökum sem eru bakaðar með rjóma, mjólk, eggjum og sykri. Kakan er svo borin fram með ferskum berjum og vanillusósu,“ segir Anna Soffía.

Ítölsk jólakaka með ferskum berjum og vanillusósu. Fréttablaðið/Stefán
Panettone – ítölsk jólakaka



500 ml rjómi

170 gr sykur

500 ml mjólk

4 stk. egg

Kakan er skorin í sneiðar og hver sneið er smurð með ágætis lagi af smjöri.

Allt hráefnið saman í pott og hitað þangað til orðið allt er vel blandað saman og aðeins byrjað að þykkna.

Kökusneiðunum er raðað í form og þykkt lag af blöndunni hellt yfir þær.

Bakað með álpappír, í 35 mín á 150°C hita.

Vanillusósa

500 ml mjólk

30 gr sykur

2 stk. vanillustangir

5 stk. eggjarauður

30 gr sykur

Mjólk, sykur og vanilla hitað saman í potti.

Eggjarauður og sykur þeytt vel saman.

Öllu blandað saman, sett í skál og látið þykkna yfir vatnsbaði.



Fjölskylda Sigmars heldur matarboð í hans anda á jólum og gaf út bók með uppskriftum hans.
Sálin sett í pottinn

Sigmar B. Hauksson þekktu landsmenn sem matgæðing og ástríðukokk. Hann lést á aðfangadag í desember árið 2012 eftir skammvinn veikindi. Fjölskylda hans ákvað að heiðra hann með matreiðslubók með uppskriftum hans, bókin Úr búri náttúrunnar inniheldur sögur af Sigmari og uppskriftir eftir hann.

Bróðir hans,  Jón Víðir Hauksson kvikmyndagerðamaður, tók saman uppskriftirnar ásamt nokkrum félögum hans.





„Sigmar hélt alltaf jólaboð í fjölskyldunni sem ég og konan mín Brynhildur höfum haldið áfram að gera eftir að hann féll frá. Þá gerum við það í hans anda, hann notaði mikið afurðir úr veiðinni og úr náttúrunni. Nýtti allt úr bráðinni og það sem íslensk náttúra hefur upp á að bjóða, ber, sveppi og jurtir.

Hann var einstakur að þessu leyti, frumkvöðull í því að nýta það sem náttúran gaf og var mikill talsmaður þess að nýta alla bráðina og allt sem til féll. Uppskriftin sem ég gef sem forrétt á jólahátíðarborðið er réttur sem enginn verður svikinn af. Risotto með reyktum laxi. Sigmar sagði að þegar risotto er gert þarf fyrst að setja sálina í pottinn, síðan hræra varlega með trésleif af stakri alúð,“ segir Jón Víðir.



Risotto að hætti Sigmars, ástríðukokks sem féll frá á jólum fyrir fjórum árum síðan. Mynd/Jón Víðir
Risotto með reyktum laxi



2 msk. skalottlaukur

2 hvítlauksrif

2 msk. fennel, saxað

150 g arborio-hrísgrjón

1 l grænmetissoð

1/2 l rjómi

Hvítvín eða vermouth

2 msk. maskarpone-ostur

Parmesanostur eftir smekk, rifinn

100 g reyktur lax eða heitreykt bleikja, grófsaxað

Safi úr einni sítrónu

Rifinn börkur af sítrónu

Dill, saxað

Skalottulaukur og fennel steikt í smjöri og olíu.

Hrísgrjónum bætt við og steikt stutta stund.

Skvetta af vermouth eða hvítvíni bætt í og heitum grænmetiskrafti, ausu í senn og hrært varlega en stöðugt þar til hrísgrjónin eru al dente, soðin - ekki mauksoðin.

Rjóma, maskarpone og parmesan hrært saman við.

Safi og börkur af sítrónu sett út í.

Lax/bleikja og dill sett út í, hrært varlega saman og skammtað á diska. 






Velkomin á Vísi. Þessi vefur notar vafrakökur. Sjá nánar.