Stjörnukonur fyrstar til að sigra Val í vetur

Stjarnan tók stigin tvö er liðið mætti Val í fjórðu umferð Olís-deildar kvenna í dag en leiknum lauk með þriggja marka sigri Stjörnunnar 29-26.

Valskonur voru taplausar fyrir leikinn með þrjá sigra í röð.

Leikurinn var jafn og spennandi og skiptust liðin á forskotinu í fyrri hálfleik en Valskonur leiddu 14-13 í hálfleik.

Þær héldu frumkvæðinu framan af í seinni hálfleik en góður lokasprettur Garðbæinga gerði útslagið.

Diana Satkauskaite var atkvæðamest í liði Valskvenna með níu mörk en næst kom Kristín Guðmundsdóttir með fimm.

Í liði Stjörnunnar var það Sólveig Lára Kjærnested sem var markahæst með sjö mörk en Þórhildur Gunnarsdóttir og Rakel Dögg Bragadóttir bættu við fjórum mörkum hvor.