Sögulegt gull hjá Murray

Breski tenniskappinn Andy Murray skráði sig í sögubækurnar í gær er hann vann gullverðlaun í tenniskeppni Ólympíuleikanna.

Murray vann því aðra leikana í röð og það hefur engum öðrum tenniskappa tekist.

Hinn 29 ára gamli Murray lagði Argentínumanninn Juan Martin del Potro í fjórum settum, 7-5, 4-6, 6-2 og 7-5.

Sumarið búið að vera gott hjá Murray því hann vann Wimbledon-mótið fyrir aðeins fimm vikum síðan.

Gærdagurinn var besti dagur Breta á leikunum í Ríó en þá komu fimm gull í hús.