Bíldudalstenging hluti nýs vegar um Dynjandisheiði

Tenging til Bíldudals verður höfð með í endurgerð vegarins um Dynjandisheiði, segir vegamálastjóri, og slær þannig á ótta Vestfirðinga um að sá kafli verði hafður útundan. Fjórðungssamband Vestfirðinga hefur gagnrýnt að í kynningu verksins sé leiðin um suðurfirði Arnarfjarðar ekki sýnd með. 

Vegagerðin sem framundan er við að rjúfa járntjaldið á miðhluta Vestfjarða verður að öllum líkindum sú viðamesta hérlendis næsta áratuginn, með Dýrafjarðargöngum og endurnýjun vegarins yfir Dynjandisheiði. En það er ekki aðeins að bjóða eigi út jarðgöngin í haust, það styttist einnig í útboð vegarins um Dynjandisheiði.

Í fréttum Stöðvar 2 sagði Hreinn Haraldsson vegamálastjóri að áformað væri að bjóða veginn um Dynjandisheiði út í áföngum. Fyrsta fjárveiting væri á næsta ári og önnur árið 2018 til að hefja það verk. 

 „Það er hins vegar stórverk, upp á fjóra og hálfan milljarð, fyrir utan tenginguna á Bíldudal. Þannig að það er ekki alveg ljóst hvenær því muni ljúka. En það er líka mun auðveldara að skipta því niður í áfanga heldur en gangagerðinni,“ segir vegamálastjóri.

En það er einmitt þessi tenging til Bíldudals sem Vestfirðingar velta fyrir sér hvort verði höfð með en frá Dynjandisheiði liggur 35 kílómetra malarkafli um sunnanverðan Arnarfjörð til Bíldudals.

Fjórðungssamband Vestfirðinga segist í umsögn til Alþingis gera alvarlega athugasemd um að við kynningu á verkefninu séu einungis settar fram tillögur um vegstæði milli Flókalundar í Vatnsfirði og Dynjandisvogs. Það vanti að tilgreina að vegur um Dynjandisheiði eigi einnig að tengja suðurfirði Arnarfjarðar, þannig að enginn vafi sé um að þetta verði samhangandi framkvæmd.

„Það er náttúrlega alveg hugsað fyrir þeirri tengingu við hönnun á veginum um Dynjandisheiði. Síðan er bara spurning um framkvæmdaröð og fjármagn á hverjum tíma hversu fljótt það kemur. En við lítum á þetta sem eitt samhangandi verkefni þannig að menn eru að byggja þennan veg milli suður- og norðurfjarða líka með það í huga að þetta sé til að tengja þéttbýlisstaðina á sunnanverðum fjörðunum. Þannig að það mun ekki gleymast,“ segir vegamálastjóri.