Massa horfir til Formúlu E og þolkappaksturs

Felipe Massa segir að hann myndi horfa til þess að ná í sæti í Formúlu E bíl eða WEC, heimsmeistarakeppninnar í þolakstri ef hann hefði ekki samkeppnishæft sæti í Formúlu 1.

Massa stendur nú í samningaviðræðum við lið sitt, Williams en orðrómur er á kreiki um að hann sé líklega að missa sæti sitt.

„Ég vil vera í Formúlu 1 þegar ég er með sæti hjá liði þar sem mér líður vel eins þarf liðið að vera samkeppnishæft,“ sagði Massa í viðtali hjá Press Association Sport.

„Ef ég finn mig í liði sem er aftarlega á ráslínunni þá mun ég hætti og fara að gera eitthvað annað,“ hélt Massa áfram.

Aðspurður um hvað það gæti orðið svaraði hann: „Ég er hrifinn af WEC [þolkappakstrinum] og kannski Formúlu E. Það er vaxandi keppni og kannski verður Formúla E allt öðruvísi og meira heillandi eftir tvö til þrjú ár,“ bætti Massa við.

Hann sagðist alls ekki hafa áhyggjur af sæti sínu hjá Williams núna. „Við þekkjum öll hvernig orðrómar virka í Formúlu 1. Ef ég á að vera hreinskilinn er ég fullkomlega laus við áhyggjur.“

Massa sagðist vera hamingjusamur hjá Williams og það væri gaman að vera þar áfram. Ég er reiðubúinn í hvað sem er,“ sagði Massa að lokum.