Costco opnar í nóvember

Bandaríska verslunarkeðjan Costco opnar verslun sína í Garðabæ í nóvember ef allt gengur að óskum. Framkvæmdir eiga að hefjast nú í júní. Þetta segir Gunnar Einarsson, bæjarstjóri Garðabæjar, en hann tók létt spjall við Bylgjumenn í Bítinu í morgun.

„Skipulagsstofnun hefur samþykkt nýtt deiliskipulag fyrir svæðið. Það var spurning um stækkun á húsnæði sem þeir hyggjast vera í og lóð undir bensíndælur. Það er búið að samþykkja skipulagið og nú er það í eðlilegu ferli. Ég geri ráð fyrir því að Costco hefji framkvæmdir þarna í byrjun júní ef allt gengur eftir og að þeir stefni á að opna í nóvember,“ segir Gunnar.

Verslunin mun rísa við Kauptúnið í Garðabæ en kaupsamningur um húsnæðið var undirritaður síðasta sumar. Húsnæðið verður allt að fjórtán þúsund fermetrar að stærð en vöruúrvalið verður gríðarlegt í versluninni. Ekki verður aðeins um matvöru að ræða heldur verður boðið upp á raftæki, bílavarahluti, dekk, húsgögn og fleira. 

„Ég er enginn sérfræðingur í Costco málum, eins og þetta snýr að okkur þá varðar þetta bara skipulagsmálin. En mér skilst að þetta sé svona meðlimaverslun, að þú verðir að vera meðlimur í versluninni getum við sagt en að þarna fáist allt milli himins og jarðar. Ég hef reyndar ekki komið inn í svona verslun sjálfur,“ segir Gunnar. 

Costco er aðeins opin meðlimum og býður upp á þrjár tegundir aðildar; fyrir einstaklinga, fyrirtæki og svo úrvalsaðild. Fyrirtækjaaðild er ætluð fyrirtækjum af öllum gerðum, þó með áherslu á að sinna þörfum smærri fyrirtækja. Einstaklingsaðild er ætluð öllum öðrum. Engar takmarkanir hvíla á aðildinni að undanskildu árgjaldi, en upphæð gjaldsins hefur enn ekki verið ákveðin. Árgjaldinu er ætlað að standa straum af óbeinum viðskiptakostnaði og gera að verkum að hægt sé að selja vörur á sem lægstu verði. Meðlimir Costco á heimsvísu eru nú yfir 71 milljón talsins.

Boða bensín og lækkað vöruverð

Eins og kunnugt er hyggjast Costco-menn einnig opna bensínstöð við verslunina. 

„Það er búið að veita leyfi fyrir bensíndælu hjá Toyota og frágangurinn á þessu er með þeim hætti að það er engin hætta á neinni mengun. Við höfum staðið mjög fast í lappirnar hvað það varðar,“ segir Gunnar aðspurður um hættuna af því að opna bensínstöð á þessu svæði. Toyta bílaumboðið stendur einnig við Kauptún.

„Það ánægjulega í þessu öllu saman er að almenningur sér fram á lækkun á vöruverði. Það er það sem þessir ágætu aðilar hafa boðað. Það er það sem mér finnst ánægjuefnið í þessu.“ 

Garðabær hefur aðeins óbeinar tekjur af rekstrinum

Gunnar hefur ekki fundið fyrir titringi hjá samkeppnisaðilum verslunarinnar en að eðlilegt sé að samkeppnisaðilar fylgist með. Hagar hafa reyndar gert athugasemd við fyrirhugað dekkjaverkstæði verslunarinnar. 

Garðabær hefur að sögn bæjarstjórans engar beinar tekjur af opnun verslunarinnar. 

„Það sem við höfum eru bara fasteignagjöld af eignunum. Þarna er stækkun á verslunarrýminu þannig að við höfum þær tekjur. En aðrar tekjur höfum við ekki nema að þetta skapar störf og þetta lyftir upp þessu svæði, Kauptúninu. Það eru svona óbeinar tekjur af því.“