Árið 2015 var erfitt fyrir lúxusmerki

Tekjur ítalska lúxusmerkisins Prada drógust saman um 26,6 prósent á síðasta ári samkvæmt nýjum tölum, talið er að lélegri sala í Kína hafi valdið lækkunum.

Asíubúar, sér í lagi Kínverjar, eru gríðarlega mikilvægur viðskiptahópur lúxusvörumarkaðarins. Þriðjungur af sölu Prada á heimsvísu á sér stað í Asíu. Hlutabréf í Prada hafa lækkað um 42 prósent á síðustu tólf mánuðum, að því er talið er vegna erfiðra efnahagsskilyrða í Kína.

Prada er ekki eina lúxusfyrirtækið sem finnur fyrir samdrætti. Sala dróst einnig saman á síðasta ári hjá Louis Vuitton, Burberry, og Hugo Boss, svo nokkur fyrirtæki séu nefnd.

Í lok síðasta árs spáði ráðgjafarfyrirtækið Bain & Co. því að vöxtur á lúxusvörumarkaði myndi vera sá minnsti árið 2015 frá 2009. Hlutabréfamarkaðir í Kína hrundu í ágúst í fyrra og varð svipuð niðursveifla í byrjun árs 2016. Mikil óvissa hefur einkennt asíska markaði í framhaldi af því. Tekjuvöxtur hjá lúxusvörufyrirtækjum gæti því einnig orðið lítill á þessu ári. 

Fréttin birtist fyrst í Fréttablaðinu 13. apríl