Hafþór: Ég hlífði Conor

Hafþór Júlíus Björnsson segir frá því í viðtali við Men's Health tímaritið að hann hafi tekið vægt á Conor McGregor þegar þeir tóku á því í október síðastliðnum.

Hafþór Júlíus er á forsíðu tímaritsins sem kemur út á morgun og segir hann frá fundi sínum við McGregor.

Hafþór er vinur Gunnars Nelson, sem var að æfa með McGregor í Dublin á þessum tíma er McGregor var að undirbúa sig fyrir bardaga gegn Jose Aldo, sem hann rotaði svo á þrettán sekúndum.

„Ég var að mynda Game of Thrones á Írlandi og vinur minn, Gunnar Nelson, var að æfa með Conor. Ég bað um að fá að kíkja á æfingu. Ég vissi að hann væri að fara að berjast í stórum bardaga og því hlífði ég honum,“ sagði Hafþór í viðtalinu.

Hann segir að það hafi komið óvænt til að þeir hafi byrjað að berjast. „Við tókum okkur stöðu eins og að við myndum fara að berjast. Svo byrjuðum við að hreyfa okkur og áður en ég vissi var alvöru slagur byrjaður.“