Fjörutíu og átta prósent meiri viðskipti með hlutabréf

Heildarviðskipti með hlutabréf í febrúarmánuði í Kauphöll Íslands námu 53.475 milljónum eða 2.546 milljónum á dag. Það er 12 prósent lækkun frá fyrri mánuði, en í janúar námu viðskipti með hlutabréf 2.897 milljónum á dag. Þetta er hins vegar 48 prósent hækkun á milli ára (viðskipti í febrúar 2015 námu 1.721 milljón á dag), segir í tilkynningu frá Kauphöllinni.

Mest voru viðskipti með bréf Icelandair Group (ICEAIR), 18.522 milljónir, Marel (MARL), 7.456 milljónir, N1 (N1), 4.367 milljónir, Reita fasteignafélags (REITIR), 3.436 milljónir, og Eimskipafélags Íslands (EIM), 3.303 milljónir.

Úrvalsvísitalan (OMXI8) hækkaði um 4,7 prósent á milli mánaða og stendur nú í 1.887 stigum.

Á Aðalmarkaði Kauphallarinnar var Landsbankinn með mestu hlutdeildina, 27,3% (27,4 prósent á árinu), Arion banki með 21,5 prósent (23,1 prósent á árinu), og Kvika banki með 20,2 prósent (18 prósent á árinu).

Í lok febrúar voru hlutabréf 19 félaga skráð á Aðalmarkaði og Nasdaq First North á Íslandi. Nemur heildarmarkaðsvirði skráðra félaga 1.024 milljörðum króna (samanborið við 1.000 milljarða í janúar).

Skuldabréfaviðskipti námu 108 milljörðum

Heildarviðskipti með skuldabréf námu 108 milljörðum í síðasta mánuði sem samsvarar 5,1 milljarðs veltu á dag. Þetta er 32 prósent lækkun frá fyrri mánuði (viðskipti í janúar námu 7,5 milljörðum á dag), og 35 prósent lækkun frá fyrra ári (viðskipti í febrúar 2015 námu 7,8 milljörðum á dag).

Alls námu viðskipti með ríkisbréf 83,3 milljörðum, viðskipti með bankabréf námu 10,7 milljörðum og viðskipti með íbúðabréf námu 9,1 milljarði. Mest voru viðskipti með RIKB 20 0205, 16,6 milljarðar, RIKB 22 1026, 12,9 milljarðar, RIKB 19 0226, 12,7 milljarðar, RIKB 25 0612, 12,4 milljarðar og RIKB 31 0124, 11,8 milljarðar.

Á skuldabréfamarkaði var Kvika banki með mestu hlutdeildina 24,9 prósent (24,9 prósent á árinu), Íslandsbanki með 20,5 prósent (20,3 prósent á árinu) og Landsbankinn með 16,4 prósent (17,9 prósent á árinu).

Aðalvísitala skuldabréfa (NOMXIBB) hækkaði um 1 prósent í febrúar og stendur í 1.176 stigum. Óverðtryggða skuldabréfavísitala Kauphallarinnar (NOMXINOM) hækkaði um 1,4 prósent og sú verðtryggða (NOMXIREAL) hækkaði um 0,8 prósent.