Hlutabréf hafa rokið upp í Íran

Hlutabréfamarkaðir víðsvegar um heiminn hafa verið sveiflukenndir frá byrjun árs og hefur gengi bréfa lækkað verulega á sumum mörkuðum. Sömu sögu er þó ekki að segja í Íran. Hlutabréf á Aðalmarkaði í Tehran hafa hækkað um 22 prósent frá því að viðskiptaþvingunum var aflétt í janúar og hafa hækkað um 25,6 prósent það sem af er ári.

Þann 16. janúar síðastliðinn hættu Bandaríkin og Evrópusambandið að beita viðskiptaþvingunum gagnvart Íran sem hefur valdið því að landið hefur nú meiri aðgang en áður að heimsmörkuðum. 

Sérfræðingar hjá ACL, fjárfestingafyrirtæki sem sérhæfir sig í Íran, segja að fjárfestar dragist að lágu verðmati markaðarins og möguleikann á nýjum fjárfestingum og auknum hagvexti. 

Hlutabréfamarkaðurinn í Tehran er meðal þeirra fimm stærstu í mið-Austurlöndum, en yfir 300 fyrirtæki eru skráð á markaðinn með 100 milljarða dollara markaðsvirði, eða sem nemur 12.700 milljörðum króna. Markaðurinn er þó lítill í alþjóðlegum samanburði.