Kennarauppreisn í Melaskóla

„Við getum lítið tjáð okkur um um þessa stöðu þá hvað varðar einstaklinga,“ segir Helgi Grímsson, sviðstjóri Skóla- og frístundasviðs Reykjavíkurborgar.

Bekkjafulltrúar allra bekkja í Melaskóla hafa samþykkt ályktun, sem þau vilja kynna öllum foreldrum í skólanum og fá sem flestar undirskriftir. Málið er umdeilt en ályktunin gengur út á að ekki verði við það búið að Dagný Annasdóttir komi aftur til starfa 1. apríl, en hún er nú í veikindaleyfi, en því lýkur 31. mars.

Vísir greindi frá alvarlegu ástandi sem upp var komið í Melaskóla fyrir nokkru.

Eins og Vísir greindi frá hafa 30 kennarar skrifað bréf til Skóla- og frístundaráðs þar sem fram kemur að ef Dagný muni halda áfram sem skólastjóri, þá muni þeir segja upp. Um er að ræða ríflega 3/4 hluta kennara. Staðan er flókin, viðkvæm og hafa heimildarmenn Vísis talað um mannlegan harmleik í því samhengi. Dagný mun hafa dregið fyrirhugaða eineltiskæru á hendur hópnum til baka, að sinni.

Helgi segir stöðuna grafalvarlega. „Áhyggjur foreldra af því að 30 kennarar muni hugsanlega hverfa frá störfum er skiljanleg. Þetta er grafalvarleg staða og fáheyrð. Við vinnum að fullum heilindum að því að finna lausn þessum vanda og þá með heill og hag nemenda og skólastarfsemi í Melaskóla að leiðarljósi. Að tryggja frið um starfið,“ segir Helgi Grímsson.

Ellert Borgar Þorvaldsson tók við stjórn skólans þegar Dagný hvarf af vettvangi en hann hefur stöðu afleysingarskólastjóra. Óvíst er hvað gerist 1. apríl.