255 laxa opnunarholl í Ytri Rangá

Veiðin í Ytri Rangá fór af stað með hvelli þegar 122 löxum var landað á fyrsta veiðidegi sumarsins í ánni.

Opnunarhollið lauk veiðum í gær og niðurstaðan er besta opnunarholl í Ytri Rangá frá upphafi.  Samtals veiddust 255 laxar á þremur dögum sem er eins og góð holl gera á besta tíma.  Í skeyti frá Jóhannesi Hinrikssyni staðarhaldara við Ytri Rangá var mikið af 90-97 sm löxum og heill hellingur af löxum sem voru 80-90 sm.  Laxarnir eru virkilega vel haldnir og það er greinilegt að tveggja ára laxinn á landsvísu hefur verið á góðum fæðuslóðum í vetur.

Það er fiskur upp um alla á og núna fer að færast meiri kraftur í göngurnar eins og gerist á þessum árstíma og haldi þetta áfram með góðum göngum af eins árs laxi eins og flestir búast við er ljóst að það verður veisla við Ytri Rangá í sumar.