Reykjanesbær rekinn með nærri hálfs milljarðs halla

Reykjanesbær var rekinn með halla upp á 455,4 milljónir króna í fyrra. Þetta kemur fram í ársreikningi bæjarins sem lagður var fram á fundi bæjarstjórnar í kvöld.

Líkt og greint var frá fyrr í kvöld, var umræðu um það hvort innanríkisráðuneytið ætti að skipa fjárhaldsstjórn yfir sveitarfélaginu frestað á síðustu stundu.

Fyrir afskriftir og fjármagnsliði var rekstrarniðurstaða bæjarins jákvæð um rúma 3,4 milljarða en að teknu tilliti til þeirra var niðurstaðan neikvæð um 455,4 milljónir.

Samkvæmt ársreikningi námu rekstrartekjur Reykjanesbæjar á árinu 2015 um 17,5 milljörðum króna samkvæmt samanteknum rekstrarreikningi fyrir a- og b-hluta. Heildareignir námu rúmum fimmtíu milljörðum og eigið fé rúmlega sex milljörðum.

Skuldir Reykjanesbæjar nema nú rúmlega fjörutíu milljörðum króna, um 230 prósentum af árlegum tekjum bæjarins.