NBA: Golden State lék sér að liði Chicago Bulls í nótt | Myndbönd

NBA-meistarnir í Golden State Warriors áttu ekki í miklum vandræðum með því að vinna stórsigur á Chicago Bulls á útivelli tveimur dögum eftir að liðð burstaði Cleveland Cavaliers á þeirra heimavelli. Oklahoma City Thunder og Toronto Raptors unnu bæði sinn sjötta sigurleik í röð í NBA-deildinni í körfubolta í nótt.

Stephen Curry skoraði 25 stig og gaf 11 stoðsendingar þegar Golden State Warriors vann 31 stigs útisigur á Chicago Bulls, 125-94. Klay Thompson var með 20 stig fyrir meistarana og Harrison Barnes skoraði 19 stig. Þetta var annar stórsigur Warriors-liðsins í röð á útivelli á móti einu sterkasta liði Austurdeildarinnar. Golden State hefur nú unnið 20 af 24 útileikjum sínum. Derrick Rose skoraði 29 stig fyrir Chicago-liðið og Jimmy Butler var með 23 stig.

Kevin Love var með 17 stig og 18 fráköst þegar Cleveland Cavaliers kom til baka eftir skellinn á móti Golden State á mánudaginn (132-98) og vann 91-78 útisigur á Brooklyn Nets. LeBron James var líka með 17 stig en hvorki hann né Love spiluðu í fjórða leikhlutanum.

Kevin Durant var með 26 stig fyrir Oklahoma City Thunder sem vann 109-95 heimasigur á Charlotte Hornets en þetta

var sjötti sigur Thunder-liðsins í röð. Russell Westbrook var með 16 stig, 15 stoðsendingar, 8 fráköst og 5 stolna bolta á aðeins 27 mínútum. Oklahoma City hefur nú unnið 21 af síðustu 25 leikjum sínum. Kemba Walker var stigahæstur hjá Charlotte með 21 stig.

DeMar DeRozan skoraði 34 stig og Litháinn Jonas Valanciunas bætti við 19 stigum og 12 fráköstum þegar Toronto Raptors vann 115-109 heimasigur á Boston Celtics og fagnaði sínum sjötta sigri í röð. Luis Scola var með 18 stig og Kyle Lowry skoraði 14 stig. Isaiah Thomas var atkvæðamestur hjá Boston með 21 stig og 10 stoðsendingar.

Chandler Parsons skoraði 7 af 30 stigum sínum í framlengingu þegar Dallas Mavericks vann 106-94 heimasigur á Minnesota Timberwolves án Dirk Nowitzki. Nýliðinn Karl-Anthony Towns var með 27 stig, 17 fráköst og 6 varin skot fyrir Úlfana og Andrew Wiggins bætti við 23 stigum.

Carmelo Anthony var með 30 stig, 9 stoðsendingar og 7 fráköst þegar New York Knicks vann Utah Jazz 118-111 í framlengdum leik. Robin Lopez bætti við 22 stigum og 12 fráköstum fyrir New York og nýliðinn Kristaps Porzingis var með 16 stig. Rodney Hood skoraði 29 stig fyrir Utah en Gordon Hayward var með 27 stig.

DeMarcus Cousins var með 36 stig og 16 fráköst og Rajon Rondo bætti við 11 stigum og 17 stoðsendingum þegar Sacramento Kings vann 112-93 útisigur á Los Angeles Lakers. Kobe Bryant skoraði bara 2 af 15 stigum sínum í seinni hálfleiknum en Brandon Bass var stigahæstur með 18 stig.

Öll úrslitin í NBA-deildinni í nótt:

Orlando Magic - Philadelphia 76ers 87-96

Washington Wizards - Miami Heat 106-87

Brooklyn Nets - Cleveland Cavaliers 78-91

New York Knicks - Utah Jazz 118-111

Toronto Raptors - Boston Celtics 115-109

Chicago Bulls - Golden State Warriors 94-125

Houston Rockets - Detroit Pistons 114-123

Oklahoma City Thunder - Charlotte Hornets 109-95

Dallas Mavericks - Minnesota Timberwolves 106-94

Los Angeles Lakers - Sacramento Kings 93-112

Portland Trail Blazers - Atlanta Hawks 98-104

Staðan í NBA-deildinni