Ekið á tvö börn á sömu gatnamótum á árinu

Slys Foreldrar í Vesturbæ Reykjavíkur segja í opnum Facebook-hóp að gatnamót Hofsvallagötu og Hringbrautar séu óásættanleg og eru uggandi um öryggi barna sinna. Í síðustu viku var keyrt á tíu ára gamlan dreng með þeim afleiðingum að hann fótbrotnaði og í janúar varð litlu eldri drengur fyrir sendibíl á sama stað. „Maður sér það miðað við slysaskráningu að þetta er einn hættulegasti staður borgarinnar fyrir óvarða vegfarendur. Ég hef lengi talið að það þurfi að grípa til aðgerða til að bæta þar úr. Eitt af því sem ég hef velt fyrir mér og látið skoða er að þess verði freistað að setja þarna algjörlega örugga leið. Annaðhvort með undirgöngum eða göngubrú,“ segir Kjartan Magnússon, borgarfulltrúi Sjálfstæðisflokksins. Kjartan segir það þó ekki auðvelt vegna þrengsla en segir það hafa verið gert við svipaðar aðstæður með góðum árangri. „Þetta er ekki hin fullkomna lausn sem bjargar öllu en með þessari lausn væri búið að tryggja örugg göngutengsl yfir Hringbraut.“ Hjálmar Sveinsson, formaður Umhverfis- og skipulagsráðs Reykjavíkurborgar, á von á því að umræða um gatnamótin verði á dagskrá á næsta fundi ráðsins. Hann segir lausn Kjartans þó ekki skynsamlega. „Bæði er mjög þröngt þarna auk þess sem það mun ekki koma í veg fyrir að fólk fari yfir götuna. Við teljum að fólk muni ekki taka mjög langan krók til að komast í undirgöng eða yfir brú,“ segir Hjálmar. Hann segir mikinn árangur hafa náðst undanfarin ár í að fækka slysum, helst með því að lækka hámarkshraða. „Það hefur oft verið talað um að lækka hámarkshraðann niður í þrjátíu en það þarf að gerast í samstarfi við Vegagerðina og lögreglu.“ „Þegar borgin hefur viljað lækka hefur það gerst að lögreglan hefur sagt nei og segir ástæðuna þá að gatan hafi yfirbragð götu þar sem keyra má hraðar. Mér finnst þetta algjörlega óþolandi viðbrögð en þetta hafa verið viðbrögðin engu að síður,“ segir Gísli Marteinn Baldursson, fyrrverandi borgarfulltrúi og fyrrverandi formaður hverfisráðs Vesturbæjar. Gísli segir málið hafa verið rætt á meðan hann gegndi formennsku. „Eina leiðin sem eitthvert vit er í er að endurhanna götuna sem rólega innanhverfisgötu eins og gert var við Hofsvallagötu með mjög góðum árangri. Hraði þar hefur verið lækkaður verulega og engar umferðarteppur hafa myndast,“ segir Gísli. Hann er ekki hrifinn af þeirri hugmynd að byggja brú eða grafa undirgöng. „Það er arfavitlaus hugmynd sem á rætur að rekja til sjöunda áratugarins er menn vildu aðgreina alla umferð. Einhverjir vilja enn vinna eftir þeim hugmyndum en þær eru úreltar. Börn munu áfram fara yfir götuna þar sem þau koma að henni.“ thorgnyr@frettabladid.is