Kostar meira að breyta flugi en að panta nýtt

Guðrún Björk Guðmundsdóttir þurfti að greiða sem samsvarar 21.300 krónum fyrir að færa innanlandsflug sitt um nokkra daga eða mun meira en fargjaldið kostar. „Mér er bara gróflega misboðið,“ segir Guðrún Björk. Guðjón Arngrímsson, upplýsingafulltrúi Icelandair segir tilefni til að endurskoða framkvæmd skilmála hér innanlands.

Guðrún Björk er búsett í Danmörku og keypti flug í einum pakka frá Kaupmannahöfn til Keflavíkur og frá Reykjavík norður á Akureyri með stuttum fyrirvara vegna veikinda í fjölskyldu. Átti hún samkvæmt bókun innanlandsflug þann 6. nóvember aftur til Reykjavíkur og heim til Kaupmannahafnar daginn eftir. Þegar hún þurfti svo að flýta för sinni til Reykjavíkur kostaði breytingin hana rúmlega 21.000 krónur.

Guðrún Björk er að vonum ósátt við það verð sem upp er gefið. „Þegar ég tjáði svo starfsmanninum að ég ætlaði þá bara að sleppa því að fljúga þennan legg og koma mér til Keflavíkur með ódýrari hætti var mér tjáð að ef ég mætti ekki í innanlandsflugið þann 6. nóvember myndi millilandaflugið til Kaupmannahafnar detta út. Þetta er auðvitað ekki bjóðandi fólki,“ segir Guðrún Björk. „Ef ég hefði keypt innanlandsflugið sér hefði það kostað mig á milli þrjú og sjö þúsund krónur að breyta innanlandsfluginu.“

Guðjón Arngrímsson, upplýsingafulltrúi Icelandair, segir þetta eiga sér eðlilegar skýringar en telur þó að flugfélagið þurfi kannski að endurskoða þetta gjald. „Hér eru keyptar fjórar flugferðir í einum pakka með þeim skilmálum að ef farþeginn mætir ekki í flug, þá telst hann hafa afþakkað þann hluta pakkans sem á eftir kemur. Vilji hann breyta ferð sinni, greiðir hann breytingagjald, og skiptir þá ekki máli hvaða fluglegg er um að ræða. Ferðaskilmálarnir í svona flugi gilda hvert sem leiðin liggur til t.d. Bandaríkjanna, Evrópu eða til Akureyrar og henta flestum. Þetta dæmi er hins vegar glögglega tilefni til þess að endurskoða framkvæmdina varðandi þessa skilmála hér innanlands,“ segir Guðjón.