Verslunareigendur á Sikiley gerðu uppreisn gegn mafíunni

Lögreglan á Sikiley hefur handtekið 22 manns grunaða um mafíustarfsemi. Voru þeir handteknir eftir að eigendur fyrirtækja í Bagheria gerðu uppreisn og neituðu að borga mönnunum svokallaða verndarfjárhæð.

Samkvæmt fréttaveitu AP voru mennirnir meðlimir í Cosa Nostra mafíunni í Bagheria, litlum bæ í nágrenni Palermo. Mennirnir stunduðu fjárkúgun og hótuðu eigendum fyrirtækja í bænum ofbeldi myndu eigendur þeirra ekki greiða sérstaka verndarfjárhæð.

Eigendur byggingarfyrirtækja, matvörubúða, kaffihúsa og annarra fyrirtækja fengu hinsvegar nóg eftir að hafa orðið innblásnir af herferð sem ungir fyrirtækjaeigendur á eynni hrundu af stað fyrir nokkrum árum þar sem markmiðið var að berjast gegn spillingu.

Höfðu fyrirtækjaeigendur í Bagheria samband við lögreglu sem handtók 22 menn við rannsókn málsins. Rannsóknargögn lögreglu gefa til kynna að hinir grunuðu hafi nýtt fjárhæðirnar til að styðja við fjölskyldur fangelsaðra mafíósa.