#Löggutíst á föstudagskvöld

Lögreglan á Norðurlandi eystra mun vera með Twitter-maraþon nk. föstudagskvöld. Lögreglumenn fyrir norðan munu segja frá öllum verkefnum sem koma inn á hennar borð í gegnum samfélagsmiðilinn Twitter.

Þetta er gert í samfloti við lögregluna á höfuðborgarsvæðinu sem hefur haldið áþekk Twitter-maraþon í tvígang við ágætar undirtektir.

„Þetta er öflugt tæki fyrir okkur að nýta til að koma upplýsingum fljótt og örugglega til almennings,“ segir Haraldur Logi Hringsson, lögreglumaður á Akureyri í samtali við Vísi. „Við höfum notað Facebook en Twitter er nýr miðill fyrir okkur.“

Lögreglan á Norðurlandi eystra hefur því stofnað Twitter-aðgang og mun segja þar frá öllum verkefnum lögreglunnar í 24 tíma, frá klukkan 18 á föstudagskvöld til klukkan sex á laugardagsmorgni.

@logreglan Við hér fyrir norðan ætlum að vera með.Hlökkum bara til. #löggutíst ttt Ég setti nokkur auka T af því við erum að norðan. #Follow

— LögreglanNorðEystra (@LogreglanNE) November 4, 2015

Lögreglan á höfuðborgarsvæðinu er mjög virk á samfélagsmiðlum og verður með Twitter-maraþon á sama tíma. Var það þeirra hugmynd að lögreglan fyrir norðan myndi fljóta með.

„Lögreglustjórinn okkar var fyrir sunnan og félagar okkar þar ýjuðu að því hvort við hefðum ekki áhuga á því að vera með í þessu,“ útskýrir Haraldur Logi.

Lögreglan á höfuðborgarsvæðinu og fyrir norðan mun notast við myllumerkið #löggutíst til þess að segja frá verkefnum sínum og er um að gera að fylgjast með lögreglumönnum að störfum nk. föstudagskvöld.

#löggutíst Tweets