Áhyggjuefni ef mannúð og hjálpsemi ýta undir öfgar

Gunnar Bragi Sveinsson utanríkisráðherra segir áhyggjuefni ef stjórnmálin séu að breytast í þá veru að mannúð og hjálpsemi í garð þeirra sem óttast um líf verði til þess að efla öfgaskoðanir og hatur. Hann vonist svo sannarlega til að það gerist ekki á Íslandi.

Þingmaður Danska þjóðarflokksins segir að sænskir stjórnmálamenn hefðu mátt eiga von á því að flóttamannahæli yrðu brennd til grunna. Svíar upplifi sig vanmáttuga gegn ástandinu og bregðist því við óábyrgum stjórnmálum á þennan hátt.

Hinar umdeildu skoðanir á gangi mála í nágrannaríkinu setti þingmaðurinn, Dorthe Ullemose, fram í lesendabréfi í Fyns Amt Avis í Danmörku.

Mörkin hafa færst til

Fjórtán flóttamannabúðir hafa brunnið í Svíþjóð frá því í sumar og er grunur um skipulagðar íkveikjur eða hatursglæpi. Vegna þessa hefur lögreglan ákveðið að  halda því leyndu, hvar slíkar búðir eru.

Skoðanir þingmanns Danska Þjóðarflokksins hafa valdið hneykslan í samfélaginu en ekki nægilega mikilli að mati Jens Rohde sem situr á Evrópuþinginu fyrir hægriflokkinn Venstre. Hann segir að ummælin séu vissulega afar gróf, en það sé enn verra að danska þjóðþingið hafi ekki fundið hjá sér hvöt til að fordæma þau. Það sé til vitnis um að mörk velsæmisins hafi færst til.

Svíar reikna með að taka á móti um 190. þúsund flóttamönnum á þessu ári og verja til þess jafngildi rúmlega 440 milljarða íslenskra króna.